مەترسی دووبارەبوونەوەی كارەساتەكەی بەیروت لە دەریای سوور لە ئارادایە

پۆڵەتیك پرێس: لاڤە واحید

هێشتا دۆسییەی كەشتی بارهەڵگری نەوتی “سافر” كە بە “بۆمبەكەی دەریای سوور”ناودەبرێت و لەساڵی ٢٠١٤ەوە لە دەریای سوردایە، هێشتا هۆشداری لەبارەی مەترسییەكانییەوە دەدرێت كە ڕەنگە ببێتە هەڕەشەیەكی گەورەی ژینگەیی لە حاڵەتی پەككەوتنی كەشتیەكە چونكە بڕی ملیۆنێك و ١٠٠ هەزار بەرمیل نەوتی لەخۆگرتووە، بەوهۆیەشەوە هۆشداری دەدرێت لەوەی گەر بتەقێتەوە ئەوا هاوشێوەی رووداوەكەی بەیروت كارەساتی مرۆیی گەورەی لێدەكەوێتەوە.

لەنوێترین ئاگاداركردنەوەدا، ئەمجارە هاوارێك لە ناوخۆیی خاوەندارێتی كەشتییەكەوە هات، بەرپرسێكی باڵای كۆمپانیای سافر رایگەیاند، چاككردنەوەو هەڵسەنگاندنی بارهەڵگرەكە لەلایەن تیمێكی پسپۆڕانی ئەمریكا بابەتێكە راستییەكان پشتگوێ دەخات و بەرەو ئاڕاستەیەكی هەڵە دەڕوات.

بەرپرسەكە بە رۆژنامەی شەرق ئەوسەتی ڕاگەیاندووە، “لە ئێستادا ئێمە ڕووبەڕووی كارەساتێكی ژینگەیی دەبینەوە، كە پێشتر نە لە مێژووی یەمەن نە لە ناوچەكانی كەنداو هاوشێوەی نەبووە، بەڵام وادیارە ئەوانەی بەرپرسیارن ئاگاداری مەترسییەكانی ئەو كەشتیە نەوتییە نین .”

چاككردنەوەو هەڵسەنگاندنی بارهەڵگرەكە لەلایەن تیمێكی پسپۆڕانی ئەمریكا بابەتێكە راستییەكان پشتگوێ دەخات و بەرەو ئاڕاستەیەكی هەڵە دەڕوات

ئاماژەی بەوەشكردووە، ئەو چارەسەرەی تیمەكانی ئەمریكا بەنیازن بۆ چاككردنەوەی كەشتیەكە ئەنجامی بدەن ڕێگایەكی ڕاست نییە، لەبەرئەوەی ئەمریكا تەنیا بۆ سەردان كردنی كەشتیەكە زیاتر لە ساڵێكی پێچووە و تا ئێستاش نەیانتوانیووە چارەسەری كێشەكە بكەن و مەترسییەكانی نقومبوونی ئەو كەشتییە كەمبكەنەوە.

لەسەر دۆخی ئێستای بارهەڵگرەكەش دەڵێت، “بەر لە دوو مانگ ئاوی دەریا دزەی بۆناو بزوێنەری كەشتیەكە كرد، بۆیە دەستمانكرد بەدەرهێنانی ئاوەكە و ئێستا تەنیا لەناو بۆرییەكاندا ئاو ماوە، هەتا ئەمڕۆش دزەكردنی نەوت بەدینەكراوە، هاوكات، ئێمە سەرقاڵی داخستنەوەی ئەو بەشە كراوانەی كەشتیەكەین هەتا ئاو نەچێتەوە ناو بزوێنەرەكە، بەڵام گرفتەكە ئەوەیە، ئەو گیراوانەی لە دەرەوە بزوێنەرەكەی دەوەستاند لە ئێستادا كار ناكەن.”

كەشتی سافر، لەساڵی 2014ەوە لەبەندەری رەئس عیسا لە دەریای سووردا كەناریگرتووە و دەستەی ئەنساروڵا وەك كارتی فشار مامەڵەی پێوەدەكات

كۆگاكانی نەوتی كەشتیەكە لەئێستادا ئەو گازەی لەدەستداوە كە كەشتیەكە لە گڕگرتن دەپارێزێت، بۆیە مەترسی ئەوە هەیە هەر جۆرە كڵپە و پریشكێكی سادە بەبێ ڕاوەستان تەواوی عەمبارەكە دابگیرسێنێت و بیسوتێنێت.

پێشتریش، وەزیری راگەیاندنی یەمەن هۆشداریدا لەبارەی مەترسییەكانی نقومبوون، یاخود تەقینەوەی بارهەڵگری نەوتی سافر، بەجۆرێك كە ئەگەر رووبدات كارەساتی مرۆیی و ئابوری و ژینگەیی گەورەتر لە تەقینەوەكەی بەیروت دروستدەكات.

كەشتی سافر، لەساڵی 2014ەوە لەبەندەری رەئس عیسا لە دەریای سووردا كەناریگرتووە و دەستەی ئەنساروڵا كە سەر بەمیلیشیای حەوسییەكانن وەك كارتی فشار مامەڵەی پێوەدەكات و رێگرە لە چاككردن، یاخود بەتاڵكردنەوەی خەزێنەی سافری نەوتی كە زیاتر لە ملیۆنێك بەرمیل نەوتی لەخۆگرتووە، بێ ئەوەی تێبینی ئەوە بكات كە گیانی هاوڵاتیانی مەدەنی دەكەوێتە مەترسییەوە و ژێرخانی ئابوری و ژینگەیی لە ئەگەری كونبوون، یاخود تەقینەوەی كەشتیەكە زیانێكی زۆریان بەردەكەوێت.