بەرپرسێكی یەكگرتوو: کادیرانی یەكگرتوو بە ئومێدی پلە و پۆست پەیوەندی بە یەكێتی و پارتییەوە دەكەن

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

بەرپرسێكی یەكگرتووی ئیسلامی دەڵێت، ئەو كەسانەی لە ناو ریزەكانی یەكگرتوودابووبن و چوبێتنە ناو یەكێتی و پارتی لەبەر پلە و پۆست بووە، كە لە ئێستا ئەو تموحە لەناو یەكگرتوودا دەست ناكەوێت.

فاتیح سەنگاوی، ئەندامی سەركردایەتی و بەرپرسی سەنتەری توێژینەوە و راپرسی یەكگرتووی ئیسلامی كوردستان لە میانی بەشداری كردنی لە بەرنامەی راڤەی پۆڵەتیك لە رادیۆی پۆڵەتیك رايگەیاند: ئەوانەی لەناو یەكگرتوو پێشتر چوونەتە ریزەكانی بزوتنەوەی گۆڕان شەپۆلێك بوو باسی دادپەروەری و ئومێد بە گۆڕانكاری گەورە، چەند كەسانێك لە یەكگرتوو كە دیاربوون و چوونەتە ناو گۆڕان بەو ئومێدە چوون وەكو چۆن خەڵكی دیكەش چوون، بۆنمونە لایەك لەیەكێتی ئەتوانم بڵێم شەق بوو، خەڵكانێك لەناو پارتی و بێلایەن بە ئومێدی گۆڕانكارییەك بوو.

ئەو بەرپرسەی یەگكرتوو وتی: ئەوەی پەیوەندی بە چوون بۆ ناو یەكێتی و پارتییەوە هەبێت بە رای من جگە لە دەستكەوت و پلە و پۆست شتێكی دیكە نییە، چونكە پەیوەندی بە دادپەروەرییەوە نییە، دۆخی ناو ئەو دوو حزبە دۆخێكە یەكێتی و پارتی خۆشیان لێی رازی نین، نا شەفافی هەیە لە زۆرشتدا كە ئەوان لێی بەرپرسن.
وتیشی: یەكگرتووش دۆخی وایە كە لە دەسەڵات نیە، ئەو كەسانەی تموحێكی لەوجۆرەیان هەیە، لە ئێستادا ئەو تموحە لە ناو یەكگرتوودا سنووردارە.

روونیشیكردەوە، دەكرێت ئەوانەش كەم و كورتی هەبووبێت بەرامبەریان لێپرسینەوە و بەداواداچوون بۆیان وەكو پێویست نەكرابێت.

لە چەند رۆژی رابردوودا هەواڵی چوونی چەند كادیرێكی باڵای یەكگرتوو بۆ ناو ریزەكانی یەكێتی و پارتی بڵاوبوویەوە، یەكێك لەو بەرپرسانەی یەكگرتووش كە پێشتر سەرۆكی ئەنجومەنی پارێزگای كەركوك بوو، وەك راوێژكاری سەرۆكی حكومەت بۆ كاروباری ناوچەكانی ماددەی 140 دەست بە كاربوو.