پۆڵەتیک پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
بەرپرسێکی هێزەکانی پێشمەرگە جەختی لەوەکردەوە، بەهۆی هەماهەنگی هاوبەشی هێزەکانی پێشمەرگە و سوپای عێراق، تێكڕای هێرشە “تیرۆرستییەکان” لەدەوروبەری خانەقین و سنورەکانی هەرێمی کوردستان بەڕێژەی زیاتر لە %80 کەمیکردووە.
ئەمڕۆ چوارشەممە محەمەد رۆستەم، معاونی فەرماندەی میحوەری دووی پێشمەرگە (قەرەتەپە – حەمرین) رایگەیاند، ژووری هەماهەنگی ئەمنی هاوبەشی هێزەکانی پێشمەرگە و سوپای عێراق لەخانەقین، ئەنجامی گەورەی ئەمنی بەدیهێناوە و پشکی هەبووە لەکەمکردنەوەی هێرشە تیرۆرستییەکانی دەوروبەری خانەقین بەڕێژەی زیاتر لە %80.
بەپێی قسەی ئەو بەرپرسە، دوو مانگ بەر لەئێستا هەفتانە سێ بۆ چوار هێرشی تیرۆرستی لەو ناوچانە ئەنجامدراون، بەڵام بوونی هەماهەنگی و پەیوەندی ئەمنی باڵای نێوان پێشمەرگە و سوپای عێراق بووەتەهۆی لەناوبردنی مۆڵگە و ئەندامانی رێکخراوی چەکداری داعش.
لەماوەی رابردوودا وەزارەتی پێشمەرگە و وەزارەتی بەرگری عێراق بەهەماهەنگی چوار ژوری هاوبەشیان لەناوچەكانی هەرێمی كوردستان كردەوە، بەوتەی بەرپرسانی وەزارەتی پێشمەرگەش پێكهێنانی ئەو ژورانە كاریگەری باشیان بۆ كەمبوونەوەی جوڵەی داعش هەبووە لەوناوچانەی بۆشایی ئەمنی هەبوو.