میترۆ داوا دەكات سەرۆكی هەرێم لێبوردنی تایبەت دەربكات بۆ سزادراوانی بادینان

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

سەنتەری میترۆ لە بەیاننامەیەكدا رایگەیاند: بڕیاری جێبەجێكردنی سزای چالاكوان و رۆژنامەنووسەكانی بادینان پێچەوانەی ویست و داخوازی زۆرێك لە رێكخراوەكانی مافی مرۆڤ و چاودێرانی پرۆسەی دیموكراسی لە كوردستان بوو، داواش دەكات سەرۆكی هەرێم دەسەڵاتەكانی بەكاربهێنێت بە دەركردنی بڕیاری لێبوردنی گشتی بۆیان.

دەقی بەیاننامەكە:

چاوەڕوانی ئەوە بووین، دادگای پێداچوونەوە ئاوڕێك لەو هەموو داخوازی و ناڕەزایەتییەی رێكخراوەكانی ناوخۆ، دەرەوە و خێزانی حوكمدراوەكان بدەنەوە، بڕیارەكەیان لە بەرژەوەندی فراوانكردنی ئازادی رادەربڕین بشكێتەوە.

بەڵام بە داخەوە بڕیارەكە پێچەوانەی ویست و داخوازی ئێمە بوو وەك سەنتەری میترۆو زۆرێك لە رێكخراوەكانی مافی مرۆڤ و چاودێرانی پرۆسەی دیموكراسی لە كوردستان.

وەك پێشتریش داخوازییەكمان خستبوویە بەردەم سەرۆكی هەرێمی كوردستان، گەر بڕیاری كۆتایی دادگای پێداچوونەوە هەمان بریاری دادگای تاوانەكانی هەولێر بێت، ئەوە دەسەڵاتەكانی خۆی بەكار بهێنێت و لێبوردنی تایبەتیان بۆ دەربكات.

بۆیە دوبارە داوا لە سەرۆكی هەرێمی كوردستان دەكەین، داخوازی ئێمە و ئەو رێكخراوانە و خێزانی حوكمدراوان، فەرامۆش نەكات و لێبوردنیان بۆ دەربكات چونكە لە رووی یاساییەوە قۆناغێكی راستكردنەوەی بریاری دادگا نەماوە، تەنها دەركردنی بریاری لێبوردنی تایبەتی سەرۆكی هەرێمی كوردستان بڕیارەكە هەڵدەوەشێتەوە.