پۆڵەتیك پرێس
ئەندامێكی پەرلەمانی عێراق رایگەیاند، بەدواداچوون دەكەن بۆ ئەو بەڵێنانەی مستەفا كازمی سەرۆكوەزیرانی عێراق لە ساڵیادی كیمیابارانی شارەكەدا بە خەڵكی هەڵەبجەی داوە و تا ئێستا جێبەجێی نەكردوون.
رۆژی 16ی ئازاری 2021 لەسەر داوای خۆیان، هەریەك لە پەرلەمانتاران بەختیار شاوەیس و موسەننا ئەمین لەگەڵ مستەفا كازمی سەرۆك وەزیرانی عێراق كۆبوونەوەو لەسەر چەند پرسێكی پەیوەست بە پارێزگای هەڵەبجە گفتوگۆیان كرد.
بەختیار شاوەیس، ئەندامی پەرلەمانی عێراق بە پۆڵەتیك پرێسی راگەیاند: لەو سەردانەماندا كازمی چەند بەڵێنێكی داوە لەوانە تەواوكردنی رێكارەكانی بەپارێزگابوونی هەڵەبجە لە حكومەتی فدراڵی و پرسی چارەنووسی منداڵە ونبووەكان.
ئەو پەرلەمانتارە وتی: تا ئێستا بەڵێنەكانی جێبەجێنەكردووە و ئێمەش بەدواداچوون دەكەین بۆ ئەو بابەتانە.
لەلایەكی دیكە رۆژی 12 ی ئەیلولی 2020 مستەفا كازمی سەرۆكوەزیرانی عێراق سەردانی پارێزگای هەڵەبجەی كرد و پاڵپشتی خۆی بۆ دانیشتووانی ئەو پارێزگایە دەربڕی لە پێشكەشكردنی خزمەتگوزارییەكان، بەڵام بە شێوەی كرداری تا ئێستا هیچ كارێكی بۆ ئەو پارێزگایە نەكردووە.