هاوڕێم سەمەد زەنگەنە … ئێمە خۆمان ئاوا کوردین

 

پ.د شوان عوسمان
هاوڕێم سەمەد ئێمە میللەتین، شمشێر تیژ و ڕمی دەستڕاست وتیروکەوانمان لەسێرەی تفەنگی ئێستا ڕاست تربوو ..
ئێمە میللەت بووین بەڵام، سێرەی تفەنگی بڕنەوی ئەوسامان لە زوومی قەنناسی ئێستا ووردبین ترو پێاکو تربوو،
ئێمە میللەتین بەڵام، لوولەی شڕە تۆپ و مەترەلۆز و زڕێپۆش و دەبابە شڕە جێماوەکانی پاشەڕۆی دووژمنانمان مۆتەکەی بەردەوامی زڕاندنی خەونی برایەتی ئێستامانە ..
ئازیزە برا ….
گاوانی کوردی و ئەبوبەسیری کوڕی، بەئێمە زۆر،ئەگەر وەکوو ڕۆم بۆ سوهەیلی ڕۆمی و فارسەکان بۆ سەلمانی فارسی ، و حەبەیشیەکان بۆبیلالی حەبەشی و تەنانەت بۆ وەحشی بکووژی حەمزەی شێری ئیسلام ،و میسرییەکان بۆ ماریەو سیرینی قیبتی کردیان ، ئێمەی کوردیش شان وباڵمان بگرتبان و وەکوو ئەمان دەیان ئەفسانەی جوانیمان بۆیان داڕشتابایەوەولەکەشکەلانی ئاسمانمان داماننابان ، بەڵام نەک نەمانکرد بەڵکوو هێدی هێدی چرووکمانکردن وکردمانن بە سنگی هەڵواسینی شکستەکانمان وتەنانەت کێ دەزانی گۆڕی ئەبو بەسیر لەتکریتەو نەک نەمانبینیون وێنەشمان نییە ..
هاوڕێی تەمەن …دەزانی لە سەرەتای دامەزراندنی ئیمپڕاتۆریەتێکی پێنج سەدەیی وەکوو دەوڵەتی خیلافەتی عەبباسی ئێمە یەکەم و هەر ئێمە دواینیان بووین ؟!
من دەتناسم دەپرسی چۆن ؟ دەڵێم هاوڕێ دامەزرێنەری ڕاستەقینەی دەوڵەتی عەبباسی بە بەیداغی ڕەشەوە وەکوو پەنگری ژێر خەڵووزی وەسفەکەی ( نصر بن سیار ) والی وشاعیری دەوڵەتی ئومەوی لەسەرخوراساندا بە نامەیەك بۆ دواین خەلیفەی دایک کوردی ئومەیی (مەروانی کوڕی محمد ) بەشیعرێک باسی کردووە کە( اری الجمر من تحت الرماد ) دەزانی پشکۆی ئەم پەنگرە وداینەمۆی شۆڕشەکەی عەبباسی ( ئەبو موسلیمی خۆڕاسانی کوردی) بوو ؟ کەپاداشتی دامەزراندی دەوڵەتی عەبباسی کوژرانی بوو بەدەستی خەلیفەی دووەمی عەبباسی (ابوجعفرالمنصور) و لەکاتی کوژرانی بەخەلیفەی ووت مەمکووژە بۆ دوژمنانت بمهێڵەوە ، وەڵامی خەلیفە ئەوبوو (جا کێ لەتۆ دووژمنترمە ؟ ) وکووشتیان ..
هاوڕێم .. ئەی دەزانی کۆڕاڵی کوردی کەناوتهێناوە ، دواین فەرماندەی لەشکری عەبباسی بوو لەبەرگری کردن لەشاری بەغدای پایتەختی دەوڵەتی خیلافەتی عەبباسی ساڵی ٦٥٦ك / ١٢٥٨ز و بەرگرییەکی پاڵەوانەی دەکرد و هۆلاکۆ و لەشکرە نەشکاوەکەی ستۆپ پێکرد ، بەڵام چارەنووسی ئەویش بەدەستی (ابن اللقمی ) و هاوڕێکانی خیانەت و ژێر ئاوخستن و تیربارانکردن بوو ..
هاوڕێم … ابن الٱپیر و امدی و دیاربكری و دینوری و شهرزوری …..تاد ئاوێنەی سەردەمەکانی خۆیان بوون و پێشەنگی هەرەپێشەنگی شارستانیەتی گەلانی موسڵمان بوون و ئەوکاتیش ئەم شارستانیەتە پێشەنگی شارستانیەتی هەموو دونیا بوو ، بە واتاێکی ترئەمانەوخەڵکانی تری زۆریش بیرمەندو زاناو فەیلەسوفی جیهانی سەردەمی خۆیان بوون لەسەرئاستی جیهانی ئەوکات ناسراوبوون ،،، بەڵام چیبوو؟ ئەمانیش نەکران بەکەرەستەو گەنجینەیی سەردەمە مێژووییە جیاوازەکانی میللەتەکەمان ، و بەڵکوو بەچاوی سووک وتێڕوانینێکی ڕادیکاڵیانەی نەتەوەیی ڕەتکرانەوەوئێستا خەریکە میللەتانی تر دەیانکەن بەمیراتی بێ خاوەنی بۆخۆیان ، چونکە زێڕوگەوهەری بێ خاوەن نامێنێتەوەو خاوەنی زۆری بۆ پەیدا دەبێ ..
ئازیزم زەنگەنە .. ئەم میللەتەی ئێمە دەڵێن زیندوو کوژی مردوو پەرستە ، پێمووایە لەمەشیاندا نەمان پێکاوە ، ئەوەتە مردووەکنیشمان نەک ناپەرستین بەڵکوو لەخۆمانیشیان ناگرین و بە خۆمانیشیان نازانین .
تۆ بیستوتە کەسایەتێکی ئێستای سیاسی وبڕیاربەدەستی کورد هەواڵی یەکێک لەم زاناو دانایانەی پرسی بێ یان گۆڕەکانیانی نۆژەنکردبێتەوە کەبەگۆڕی هەرهەموویان پارەی جیکلاسێکی جەماعەتی تێناچێ ؟ .
ئازیزم .. پرسیووتە ( سەڵاحەدین بەمن چی کوردبێ یان عەرەبێکی تکریتی) ، مێژوو واناڵێ ، سەڵاحەددین هەرگیز نەی وتووە کەمن عەرەبم ، تەنانەت کە پێیانووتوە کەسێک لەبنەماڵەکەت دەڵێ ئێمەی ئەیوبی بنەچەمان عەرەبە ، وەڵامی سەڵاحەددین ئەوەبووە ( ئەم بنەچەیەی ئەو باسی کردووە بنچینەی نییە ) و بەڵام چیکردو چینەکرد ئەو وەکوو سەرکردەێکی موسڵمانی کوردی کردوویەتی و نیقەمەتەکەی بۆکورد جێماو رەحمەتەکەشی بۆ خۆهەڵکێشانی عەرەبە کەتوانیوویانە هەموو ئەوروپا ببەزێنن ، لەمەشیاندا نەمانتووانیووە لەهیچ ڕووێکەوە بۆ میللەتەکەمان تەسخیری بکەین و بیکەین بەکەرەستێکی میللی نیشتیمانی و نەتەوەیی کەگوزارشتی لەقۆناغێکی مێژوویی ڕۆژهەڵاتی ناوەڕاست و مێژووی ئەوروپاو ئاسیا و ئەفریقیا کردووە .
دەزانی هاوڕێم … میللەتی کورد هەڵاودێروجیاوازە لە هەموو میللەتانی دونیا ؟؟؟!!!! سەیرت پێ نێت و مەبەستم ئەوە نییە پەنجا ملیۆنین و دەوڵەتمان نییە ،،، بەڵکو هەموو کەسایەتی سیاسی و سەربازی و فیکری و هونەری و سەرجەم سەکتەرە جیاوازەکان ژیانی مرۆڤ ، لەنێــــــــو میللەتی خۆیان سەرهەڵدەدەن و میللەتەکەیان دەبێتە پاڵپشت و دیوارێکی پۆڵاین ، لەوێوە بۆ ئاسۆجیاوازەکانی جوگرافیایی دونیا هەنگاودەنێن ودەبێنە کارەکتەرو فیگەری کاریگەری بوارەکەی خۆیان ، بەڵام لەنێو میللەتەکەی ئێمە لەمەیان ڕێک پێچەوانەیە ،
پەندێکی کوردی هەیە دەڵێ (خزم خزمی لا هیچە ) هەر لە بازنەی یەکەمەوە خزمەکانی دژایەتی و سووکایەتی و هەر هیچ نەبێ پشتگیری نەکردن دەست پێدەکات ، و ئینجا هەڵقەکە فرەوان دەبێت تا وایلێدێت شار بەدەر و ووڵات بەدەریش دەکرێ ، بەڵام بەدەرکراوەیی و بێکەسی و نامۆیی لەنێو میللەتێکی تردا ئەم کەسە دەبێتە کارێزما و پێشەنگ و فەرماندە وسەرکردە و …. تاد ، بەپێ پسپۆڕی وشارەزایی ، نموونەێکت بۆ باس بکەم ( زریابی کوردی )کەلەساڵی ۱۷۳ك/۷٨۹ لە شاری میسل لە دایکبووەو زۆر شارەزای لەمیوزیک هەبوو تائەو ڕادەیەیی دەگاتە کۆشکی خەلیفە هارون الرشید و لەڕێگای ئیسحاق میسلی مامۆستایەوە کەئەمیش خوێندکاری ئیبراهیم میسلی بوو ، زریاب لەشارەزایی بێ ئەندازەی لەژەنینی عود و دەنگە ئەفسووناویەکەی بوو بەجێگای شۆگ و سەرسوڕمانی خەلیفە هاڕون و ئەمەش بووە مایەی ئیرەی ئیسحاقی مامۆستای وتاهەڕەشەی کووشتن کەدەبێت بەغدا جێبهڵێت ، ئەمیش سەری خۆی هەڵگرت و نەک بەغدا بەڵکوو عێراق و کێشوەری ئاسیا و تەنانەت کێشوەری ئەفریقیاشی بڕی و چووە ئەندەلس (نیمچە دوورگەی ئیبریا = ئیسپانیا و پورتوگالی ئێستا ) لە قورتوبەی پایتەخت گیرسایەوەو لەوێ جگە لەدامەزراندنی ماڵی میوزیک بەڵکوو بووبە مۆدێلێکی تازەی گۆرانی و ئاوازو ئەتەکێت کەتائێستاش بەداهێنەری وەتەری چەندەمی عود و داهێنەری موشەحاتی ئەندلوسی دادەنرێت، کەڕاقی ترین شێوازی میوزک وئاوازوگۆرانیەو تائێستاش لەناوەندە ئەکادیمیەکان دەخوێندرێ نەک هەر لەجیهانی ئیسلام وڕۆژهەڵات بەڵکوو لەئەوروپاو ڕۆژئاوا بەگشتی .
هاوڕێم زریابی دوومەیش کەئێستا لەژیاندایەو کەس لەکورد گرنگی پێنادات ولەکاتێکدا هەموو دونیای میوزکی پێوە سەرقاڵە ئەمیش (نەسیر شەممەیە ) کەلەوانەیە زۆرینەی هەرەزۆری کورد ناویشی نەبیستبێ ، هەرچەندە خۆی جاڕی داوە دەڵێ من کوردم و منداڵەکانیشم کوردی دەزانن وقسەی پێدەکەن ،،هاوڕێم کەواتە لەنێوان هەردوو زریاب نزیکەی 700 ساڵە دۆخەکە وەکوو خۆیەتی ونەگۆڕاوە ،،،، ئیتر باسی مەولانا خالید و دەرکردنی و حاجی قادرو دەرکردنی و نالی و سالم و دەیان و سەدان و ئێستاش هەزاران کوردی ترناکەم کە لەئاوارەی و لەنێو میللەتانی تردا بوون بەفیگەری کاریگەرو لەنێو خۆشماندا کردمانن بە سووک و چرووک … بۆیە ئاسایی بێ لات بایدن و میکی لیڤی فیگەری خۆیان وکارێزمای وگرافیایی خۆیان بن وخەمی ڕادەستکردنی ئەمریکاو ئیسرائیلیشت هەرگیز نەبێ ، چونکە میللەتەکانیان لەپشتە میللەت.

پەخشی راستەوخۆی رادیۆ پۆلەتیک