پۆڵەتیك پرێس
تیمی كوردستانی عێراقی سی پی تی، نوێترین داتا و ئاماری چل ڕۆژی یەكەمی ئۆپەراسیۆنی چنگی – هەورە بروسكە بڵاودەكاتەوە و نەخشەی فراوانكردنی هەژموونی سوپای توركیا لە خاكی هەرێمی كوردستاندا دەخاتەڕوو.
بەپێی نوێترین ئاماری رێكخراوەكە كە بە پۆڵەتیك پرێس دراوە، لە هەفتەی یەكەمی ئۆپەراسیۆنی چنگی – هەورە بروسكەدا، چوار بارەگای سەربازی بە پانتایی ناوچە شاخاویەكانی زناری كێستە، كەفرە سۆر، مەلا ردی و دەرارێ جێگیر كراون.
هاوكات لە ماوەی 40 ڕۆژی یەكەمی ئۆپەراسیۆنی چنگی – هەورە بروسكە دا 16 گوند لە ناوچەی ئاڤاشین و حەوت گوند لە سنوری ناحیەی كانی ماسێ بە هۆی بۆردوومانەكان چۆڵكراون و بەمەش نزیكەی300 خانەوادە لە هەردوو ناوچەكە ئاوارەبوون.
لە بەشێكی دیكەی ئامارەكەدا هاتووە، لە نۆ ڕۆژی سەرەتای ئۆپەراسیۆنەكەدا، 1300 پورەی هەنگی هەنگەوانانی گوندنشینانی كانی ماسێ و ئاڤاشین لەناوچوون و لە ماوەی 40 ڕۆژی ئۆپەراسیۆنەكەدا حەوت هەزار دۆنم زەوی كشتوكاڵی بە هۆی بۆردوومانەكانەوە سوتاون.
ئەوەشخراوەتە ڕوو، لە ماوەی دەستپێكردنی ئۆپەراسیۆنی چنگی – هەورە بروسكەوە تاوەكو ئێستا، چوار هاوڵاتی مەدەنی لە سنوری ناحیەی كانی ماسێ و زاخۆ برینداربوون.
راپۆرتەكەی سی پی تی، باس لەوە دەكات بەهۆی بۆردوومانەكانەوە پڕۆژەیەكی سەرەكی ئاو لە گوندی ئەدنێ لە ناحیەی كانێ ماسێ كە ئاوی نۆ گوندی تری دابین دەكرد، وێران بووە.