پۆڵەتیک پرێس
سەرۆکی هەرێمی کوردستان لەگەڵ باڵیۆزی یەکێتی ئەوروپا لە عێراق کۆبووەوەو چەند پرسێکی جۆراوجۆریان تاوتوێ کرد.
بەگوێرەی ڕاگەیەندراوێکی سەرۆکایەتی هەرێم، ئەمڕۆ چوارشەممە ٢٦ ی ئایاری ٢٠٢١، نێچیرڤان بارزانی، سەرۆکی هەرێمی کوردستان و مارتن هۆس، باڵیۆزی یەکێتی ئەوروپا لە عێراق لە شاری هەولێر کۆبوونەوەو دوا پێشهاتە ئەمنی و سیاسیەکانی عێراق و پەیوەندییەکانی نێوان هەولێر و بەغدا لەگەڵ کۆمەڵی نێودەوڵەتی و هەوڵەکانی ئامادەکردنی دەستور و هەڵبژاردنی پێشوەختەی عێراقیان تاوتوێ کردووە”.
بەگوێرەی ڕاگەیەندراوەکە هەردوولا هاوڕا بوون لەسەر گەشەپێدانی پەیوەندییەکانی نێوان عێراق و هەرێم لەگەڵ یەکێتی ئەوروپا و فراوانکردنی بوارەکانی کاری هاوبەش و هەماهەنگی نێوانیان. هاوکات هاوڕاش بوون لەسەر ئەوەی عێراق و هەرێم پێویستیان بە پشتیوانی زیاتری یەکێتی ئەوروپایە لە زۆر بواردا.
ڕاگەیەندراوەکە ئاماژەی بەوەش کردووە، ” دۆخی هەرێمی کوردستان و ئازادییەکان و دیموکراتی و مافی مرۆڤ” تەوەری دیکەی گفتوگۆکانی نێوان نێچیرڤان بارزانی و مارتن هۆس بوون.