پۆڵەتیك پرێس
هاوسەرۆکی یەکێتیی نیشتیمانیی کوردستان لە شاری سلێمانی لەگەڵ نوێنەری تایبەتی سکرتێری گشتیی نەتەوە یەکگرتووەکان لە عێراق كۆبووەوە ولەكۆبونەوەكەدا گفتوگۆ کرا دەربارەی دۆخی دوایین پێشهات و گۆڕانکارییە سیاسی و ئابوورییەکانی عێراق و هەرێمی کوردستان.
بەگوێرەی راگەیەندراوێكی هاوسەرۆكی یەكێتی لاهور شێخ جەنگی، لە كۆبونەوەكەیدا لەگەڵ جینین هێنیس پلاسخارت نوێنەری تایبەتی سکرتێری گشتیی نەتەوە یەکگرتووەکان لە عێراق، تاوتوێی دوایین پێشهات و گۆڕانکارییە سیاسی و ئابوورییەکانی عێراق و هەرێمی کوردستان و هەڵبژاردنی پێشوەختەی پەرلەمانی عێراق و پرسی چاکسازی و یەکخستنی هێزەکانی پێشمەرگە كرا.
هەروەها جەختیان لەسەر گرتنەبەری ڕێوشوێنەکانی ڕووبەرووبوونەوەی ئەو ئاڵنگارییانەی کە بوونەتە ئاستەنگ لە بەردەم چارەسەرکردنی کێشەکان، پلاسخارت بە پەرۆشەوە دەستی خستە سەر کێشەکان و داوای نەهێشتنی ناکۆکییە سیاسییەکان و یەکڕیزی و تەبایی نێوان لایەنەکانی کرد، ئەوەی خاتوو پلاسخارت داوای دەکات هەمان داواکاریی یەکێتیی نیشتیمانیی کوردستانە.
لە بەشێكی دیكەی راگەیەندراوەكەدا ئاماژەبەوەدراوە، هەر لەو كۆبونەوەیەدا باس لە کێشە هەڵپەسێردراوەکانی نێوان حکومەتی هەرێمی کوردستان و حکومەتی فیدراڵی كراوە و پێویستی چارەسەرکردنی کێشەکان لەسەر بنەمای دەستوور و پابەندبونی هەردوولامان بە ڕێککەوتنە ئیمزاکراوەکانی نێوانیان دووپاتکردەوە.
خواستی یەکێتیی نیشتیمانیی کوردستان دوپاتكراوەتەوە بۆ پشتیوانی لە پرۆسەی چاکسازیی هێزەکانی پێشمەرگە بە ڕەچاوکردنی بنەمای هاوسەنگی و دوورکەوتنەوە لە بەرژەوەندیی حزبی بۆ سەرکەوتنی پرۆسەکە.