پۆڵەتیك پرێس
سبەینێ ژووری ئۆپراسیۆنی هاوبەشی نێوان پێشمەرگە و سوپای عێراق لە سنووری پارێزگای كەركوك دەست بەكار دەبن و لێپرسراوێكی باڵای وەزارەتی پێشمەرگەش رایدەگەیەنێت، ئەركی ژوورە هاوبەشەكە بۆ ئاڵوگۆڕكردنی زانیاریی و بنبڕكردنی چالاكییەكانی داعشە لەوسنوورە.
لیوا قارەمان كەمال جێگری سوپاسالاری وەزارەتی پێشمەرگە بە پۆڵەتیك پرێسی راگەیاند، پێشتر وەزارەتی پێشمەرگە تێبینی هەبووە لەسەر ژمارەو پێكهاتەی ژوورەكان و ئەو شوێنانەی ژووری ئۆپراسیۆنی هاوبەشی نێوان هێزەكانی پێشمەرگە و سوپای عێراق تێدا دەكرێتەوە.
وتیشی، لە كۆبوونەوەی سەرۆك وەزیرانی عێراق لەگەڵ وەڤدی وەزارەتی پێشمەرگەو وەزارەتی بەرگری عێراق كێشەكان چارەسەركران و بڕیاردرا بەزووترین كات ئەو ژوورە هاوبەشانە بكرێنەوە.
ئاماژەی بەوەشكرد، سبەینێ 23 ی ئایار ژووری هاوبەشی نێوان هێزەكانی پێشمەرگە و سوپای عێراق لەسەربازگەی K1 لەسنوری پارێزگای كەركوك دەست بەكاردەبن و ئەركیان ئاڵوگوڕكردنی زانیاری و دانانی بەرنامەیە بۆ چۆنێتی رووبەڕووبوونەوەی چەكدارانی داعش و رێگری لەئەنجامدانی چالاكییەكانی داعش لەكەركوك و ئەنجامدانی كاری هاوبەشی سوپاری عێراق و پێشمەرگە پێكەوە.
بەوتەی جێگری سوپاسالاری وەزارەتی پێشمەرگە، كردنەوەی ژوورە هاوبەشەكان پەیوەندی بەگەڕانەوەی هێزەكانی پێشمەرگەوە نییە بۆ ناوچە كوردستانییەكانی دەرەوەی هەرێم و بەهیچ شێوەیەكیش باسنەكراوە.
بەگوێرەی زانیارییەكان هەشت ئەفسەری پێشمەرگە لە لیواکانی 1 و 2 ی وەزارەتی پێشمەرگە نوێنەرایەتی وەزارەتی پێشمەرگە دەكەن لە ژووری ئۆپراسیۆنی هاوبەشی نێوان پێشمەرگە و سوپای عێراق لە سنووری پارێزگای کەرکوک كە بارەگای ژوورە هاوبەشەكە دەکەوێتە ناو سەربازگەی K1 لە کەرکوک.
هاوكات بڕیارە لەم هەفتەیەدا ژوورەهاوبەشەكانی نێوان نێوان پێشمەرگە و سوپای عێراق لە مەخمور و موسل بكرێنەوە ئەوەش دوای ئەوە دێت سەرەتای هەفتەیەى پێشوو ژووری ئۆپراسیۆنی هاوبەشی نێوان پێشمەرگە و سوپای عێراق لەقەزای خانەقینی سەربەپارێزگای دیالە دەستبەكاربوون.
قەیوان گروپ
مایۆرکا سیتی جوانییەک لە دڵی سروشتدا
