هاوسەرۆكی یەكێتی تاجەگوڵینەی لەسەر مەزاری عادل موراد دانا

ئەم بابەتە 30 جار بینراوە

پۆڵەتیك پرێس

پاشنیوەڕۆی رۆژی 18-5-2021، بە ئامادەبوونی لاهور شێخ جەنگی هاوسەرۆكی یەكێتیی نیشتمانیی كوردستان و بەرپرسانی یەكێتی و هاوڕێ و هاوسەنگەران و خانەوانەدەکەی، لە گردی سەلیم بەگ لە سلێمانی رێورەسمی ساڵیادی كۆچی دوایی “عادل موراد” ئەندامی دەستەی دامەزرێنەری یەكێتیی نیشتمانیی كوردستان بەڕێوەچوو .

لە رێورەسمەكەدا سۆران جەمال تاهیر، لێپرسراوی مەكتەبی پەیوەندییەكانی یەكێتی، وتەیەكی پێشكەشكردو رایگەیاند: سێ ساڵ لەمەوبەر یەكێتی هەڤاڵێكی تێكۆشەر و نیشتمانپەروەر و دڵسۆز و بەوەفای لە دەستدا كە ئەویش هەڤاڵ عادل موراد بوو كە لەدەستدانی زیانێكی گەورەی بە یەكێتی و گەلەكەمان گەیاند و هەموومانی خەمباركرد.

ئاماژەی بەوەشدا، عادل موراد لەدوای هەرەس، یەكێك بوو لەو كەسانەی كە لەگەڵ مام جەلال و هاوڕێكانی تریدا لە دیمەشق رۆڵی هەبوو لە دامەزراندنی یەكێتی و هەڵگیرساندنی شۆڕشی نوێی گەلەكەمان بە سەركردایەتی سەرۆك مام جەلال، هەمان كات كاك عادل هەم لەناو حزب و هەم لە حكومەتیش چەندین بەرپرسیارێتی و پۆستی وەرگرتووە و زۆر دڵسۆزانە و بە لە خۆبردوییەوە توانیویەتی ئەركەكانی جێبەجێبكات.

لە كۆتایی رێورەسمەكەدا لاهور شێخ جەنگی هاوسەرۆكی یەكێتیی نیشتمانیی كوردستان و ئەندامانی مەكتەبی سیاسی و سەركردایەتی و مەڵبەندەكان و مەكتەبەكانی یەكێتیی لەسەر مەزاری عادل موراد تاجە گوڵینەیان دانا.

عادل موراد لە 11-12-1949 لە خانەقین لە دایكبووە و بڕوانامەی بە كالۆریۆسی لە زانكۆی بەغدا بەدەستهێناوە و لە تەمەنی لاوێتییەوە دەستی بە كار و خەباتی سیاسیی كردووە و یەكێكە لە ئەندامانی دەستەی دامەزرێنەرانی یەكێتیی نیشتمانیی كوردستان.

چەندین پلە و پۆستی حزبی و حكومی وەرگرتووە.

رۆژی 18-5-2018 لە تەمەنی 69 ساڵی لە ئەڵمانیا كۆچی دوایی كرد.

پەخشی راستەوخۆی رادیۆ پۆلەتیک