پۆڵەتیک پرێس
وتەبێژی حکومەتی ئێران جەختی لەوە کردەوە دوو قۆناغی سەرەکی گفتوگۆ لەنێوان نوێنەرانی وڵاتەکەی و عەرەبستانی سعودیەدا بەڕێوەچووە.
عەلی ڕوبەیعی، وتەبێژی حکومەتی ئێران، ئەمڕۆ سێشەممە ١١ ی ئایاری ٢٠٢١ ڕایگەیاند، لە ماوەی ڕابردوودا دوو قۆناغی سەرەکی گفتوگۆ لەنێوان ئێران و سعودیەدا بەڕێوەچووە، ئەوانەی پێشتر تەنها سەرەتایی بوون .
ڕوبەیعی لە ڤیدیۆ کۆنفراسێکی هەفتانەدا بەبێ ئاشکراکردنی شوێنی گفتوگۆکان وتی، “نێردراوانی هەردوو حکومەتی ئێران و سعودیە گفتوگۆکانیان ئەنجامداوە”. بەڵام سەرچاوە میدیاییە هەرێمی و نێودەوڵەتییەکان ئاماژە بەوە دەکەن گفتوگۆکان لە بەغدا و بە نێوەندگیری عێراق ئەنجامدراون.
لەبارەی ئەجێندای گفتوگۆکانەوە، ڕوبەیعی وتی، ” گفتوگۆکان سەرنجیان خستووەتە سەر کێشەکانی هەردوولا و کێشە هەرێمییەکان و تا ئەوکاتەی دەشگەنە دەرئەنجامێک بەردەوام دەبن”.
وتەبێژی حکومەتی ئێران ڕاتیشیکردەوە لەبارەی وردەکاری گفتوگۆکانەوە هیچ زانیارییەک ئاشکرا بکات تا ئەو کاتەی دەگەنە دوا دەرئەنجام.
پێشتر پەیمانگای “بروکینگز” ڕاپۆرتێکی شیکاری لەبارەی گفتوگۆکانی ئێران و سعودیە بڵاوکردەوەو ئاماژەی بەوە کردبوو، کەمکردنەوەی ناکۆکییە تائیفییەکانی ناوچەکە لەبەرژەوەندی ئەمریکایە و بەتایبەتی هاوکارییەکانی عێراق بۆ دیالۆگی ئێران و سعودیە پشکی هەیە لەکۆتاییهێنان بە جەنگی یەمەن کە پێشتر جۆ بایدن، سەرۆکی ئەمریکا پەیمانی وەستاندنیدا.