پۆڵەتیک پرێس
باڵیۆزخانەی ئێران لەعێراق جەختی لەوەکردەوە، وڵاتاکەی داوای نەکردووە و داواش ناکات هیچ چالاکوانێکی عێراقی بکوژرێت.
ئەوەش لەکاتێکدایە رۆژی یەکشەممە هەواڵی کوژرانی ئیهاب وەزەنی، چالاکوانی دیاری عێراق و ئەندامی دەستەی هەماهەنگی خۆپیشاندانەکان بڵاوکرایەوە و ژمارەیەک چالاکوانی عێراقیش میلیشیاکانی سەربە ئێرانیان تۆمەتبارکرد بە کوشتنی ئیهاب و بەئامانجگرتنی چالاکوانانی عێراق.
لایخۆیەوە باڵیۆزخانەی ئێران لەعێراق ئیدانەی کوژرانی ئیهاب وەزەنی کرد و هاوخەمی خۆی بۆ خێزان و کەسە نزیکەکانی ئەو چالاکوانە دەربڕی و رەتیکردەوە وڵاتەکەی هیچ رۆڵێکی هەبووبێت لەکوژرانی ئەو چالاکوانە.
داواشی لەهاوڵاتیان و خۆپیشاندەرانی عێراق کرد هێرش نەکەنەسەر شوێنە دیبلۆماسییەکانی وڵات و کونسوڵخانەکان، چونکە ئەم جۆرە کارە دەبێتەهۆی تێکدانی پەیوەندی نێوان عێراق و وڵاتانی دیکە و بەربەست لەبەردەم پێشکەشکردنی خزمەتگوزری بەهاوڵاتیان دروست دەکات.
ئەوەش لەکاتێکدایە، شەوی رابردوو خۆپیشاندەران وەک کاردانەوەیەک بۆ کوژرانی ئیهاب وەزەنی چالاکوان، هێرشیان کردەسەر کونسوڵخانەی ئێران لەپارێزگای کەربەلا.