مێرویەک هێرش دەکاتە سەر ویلایەتەکانی ئەمریکا

پۆڵەتیک پرێس

ناوچەیەکی زۆری ئەمریکا ئامادەیە بۆ پێشوازیکردن لە بلیۆنێک مێروی زیز دوای خۆشاردنەوەیان لە چەقی زەویدا بۆ ماوەی ١٧ ساڵ، ئەمەش ترس و دڵەڕاوکێی لای هەندێک کەس دروستکردوە و لای هەندێکیش پەرۆشی دروستکردوە.

ئەمریکیەکان لە تۆڕە کۆمەڵایەتیەکان ئامۆژگاریەکی زۆر لەنێوان خۆیاندا دەگۆڕنەوە بۆ ڕوبەڕووبونەوەی ئەو مێروانە پێش داگیرکردنی شەقام و باخچەکان.

زانایان دەڵێن: چاوەڕوان دەکرێت بلیۆنێک مێروی زیز هێرش بکەنە سەر ١٥ ویلایەتی ئەمریکا و دەنگە دەنگێکی زۆر گەورە دروست دەکەن، هەروەها مێروەکان دوای دانانی هێلکە و وەچەخستنەوە دەمرن.

دواین دیاردەی لەوشێوەیە لەساڵی ٢٠٠٤ دا ڕوویداوە، چاوەڕوان دەکرێت لەکاتی نزیکیشدا دوبارەبێتەوە بەڵام کاتێکی دیاریکراوی بۆ دانەنراوە، چونکە دیاردەکە پەیوەندی هەیە بە بارودۆخی کەش و هەواوە وەک، پلەی گەرمی و شێ، هەروەها کەشی سارد ڕوودانی دیاردەکە دوادەخات.

مێروی زیز لە مێروە دڕندەکان نییە، بۆ نموونە هێرشەکانی وەک کوللە نییە، هەندێکجار زیان بە درەختەکان دەگەیەنێت، بەڵام بەشێوەیەکی گشتی زیان بە درەخت و ڕووەکەکان ناگەیەنێت.

مێروی زیز خۆراک لە ڕووەکەکانەوە وەردەگرێت، هەروەها هێرش ناکاتە سەر کەسەکان و پێوەیان نادات و گازیان لێناگرێت.