پۆڵەتیك پرێس
مەكتەبی سیاسی یەكێتیی نیشتمانیی كوردستان، سەبارەت بە كەیسی سزادراوانی بادینان راگەیەندراوێكی بڵاوكردەوە و رایدەگەیەنێت “هەوڵەكانیان بۆ لابردنی سزای ئەو رۆژنامەنوس و چالاكوانانە بەگەڕخستووە”.
رۆژی سێشەممە، 4ی ئایار دادگای پێداچونەوەی ھەرێم سزای بەندکردنی رۆژنامەنوس و چالاکوانانی بادینانی پەسەند کرد، ئەو بڕیارەش نیگەرانی زۆری بەدوای خۆیداهێنا.
لەراگەیەندراوێكیشدا مەكتەبی سیاسی یەكێتیی نیشتمانیی كوردستان رایگەیاند: “بەوپەری نیگەرانیەوە دەڕوانێتە بڕیاری دادگای تەمیزی ھەرێم لەبارەی پەسەندكردنی سزای ناعادیلانەی سەر چالاكوان و رۆژنامەنوسە دەستگیراوەكانی بادینان”.
یەكێتی پێشهاتێكی لەمجۆرە، بە مەترسییەكی گەورەیە لەسەر سەروەری دادگاكان، بنەماكانی مافی مرۆڤ، دیموكراسی و ئازادیی رادەربڕین لەناو هەرێم ناوزەند دەكات، پێیوایە وێنای ھەرێمی كوردستانیش لەبەرچاوی كۆمەڵگای نێودەوڵەتی دەشێوێنێت.
لەزانیاریەكانی راگەیەندراوەكەدا هاتووە، یەكێتی وێرای ئەوەی لەرێگای كەناڵە رەسمیەجۆراوجۆرەكانەوە ھەوڵ و فشاری بەگەرخستووە بۆ لابردنی سزای ناعادیلانەی سەر دەستگیراوەكانی بادینان، لەھەمان كاتدا داوا دەكات سەرۆكی ھەرێمی كوردستان دەسەڵاتی یاسایی خۆی بەكاربێنێ و لێبوردنی تایبەت بۆ سزادراوەكان دەربكات، هاوكات پەرلەمانی كوردستانیش ھەڵوەستەی جددی بكات لەسەر كەیسەكە و سەربەخۆیی دەسەڵاتەكان لە دەستێوەردانی یەكتری بپارێزێت.
مەكتەبی سیاسی یەكێتی جەختیش دەكاتەوە، ئەزموونی ھەرێمی كوردستان و گەل، پێویستی بە پشتیوانی و ھاوسۆزی وڵاتانی دۆست ھەبووە و ھەیە، تۆمەتباركردنیان بە ناڕەوا و نیگەرانكردنیان خزمەت بە بەرژەوەندییە باڵاكانی گەل ناكات، و بۆ ئەوەی لە تەنگەژەكاندا پشتیوانی ئەزموونەكەیان بن، پێویستە بە چاوی وەفاوە لێیان بڕوانرێت و رێزیان لێبگیرێت.
قەیوان گروپ
مایۆرکا سیتی جوانییەک لە دڵی سروشتدا
