دەمیرتاش پەیامێك ئاڕاستەی حزبە ئۆپۆزسیۆنەكانی توركیا دەكات

ئەم بابەتە 67 جار بینراوە

پۆڵەتیك پرێس

هاوسەرۆكی پێشووتری پارتی دیموكراتی گەلان (هەدەپە)، لە زیندانی ئەدیرنەوە پێشنیارێكی بەناوی (پێنشیارێك لەسەر شێوازی رێككەوتن)، ئاڕاستەی حزبە ئۆپۆزسیۆنەكانی ئەو وڵاتە كردووە.

سەلاحەدین دەمیرتاش هاوسەرۆكی پێشووتری هەدەپە، لەتویتێكداو بەئامانجی تێپەڕاندنی دۆخی ئێستای توركیا ئەو داوایەی ئاڕاستەی لایەنە ئۆپۆزسیۆنەكان كردووەو دەڵَێت، هەڵەیە وا بیربكەنەوە دەسەڵاتی ئاكپارتی لەخۆیەوە كۆتایی پێدێت یاخود زیانمەند دەبێت.

ئاماژەی بەوەشكردووە، لەكاتێكدا ئەگەر ئاكپارتی شكستبهێنێت، ئەوا زۆر گرنگە ئۆپۆزسیۆن بزانێت چی گرنگە، بۆیە پێویستی دەزانێت رێككەوتنێكی دیموكراسی ئەنجامبدرێت و لە رێككەوتنەكەشدا هیچ لایەن و حزبێك فەرامۆش نەكرێت.

دەمیرتاش لەچەند خاڵێكدا باس لە پەیامەكەی دەكات لەوانەش داوای نوسینەوەی دەستورێكی هاوچەرخ و گونجاو دەكات كە لەگەڵ رای گشتی بگونجێت، لەگەڵ سیستمێكی پەرلەمانیی سەركەوتو و بەهێز.

هاوكات دەشڵێت،، پێویستە هەموو جۆرەكانی توندوتیژی كۆتایی پێبهێندرێت و ئاشتەوایی كۆمەڵایەتی بەرقەراربكرێت، هەروەها لایەنی دادوەریش بێلایەن بێت.
جەخت لەوەشدەكاتەوە، رێكاری پێویست لە دژی زیادەڕەوی، بەرتیل و بێپلانی بگیرێتەبەر.

لەبەشێكی دیكەی پەیامەكەیدا بە پێویستی دەزانێت سیستمێكی دادپەرورانە لە وەرگرتنی باج و سەرانەدا هەبێت، هاوكات ئازادیی میدیا و دامەزراوەكان پارێزگارییان لێبكرێت.

سەڵاحەدین دەمیرتاش لە 4ی تشرینی دووەمی 2016 لە چوارچێوەی لێكۆڵینەوەكانی تیرۆر دەستگیركراو زیاتر لە چوار ساڵە لەگرتووخانەی ئەدیرنە بەندكراوە، چەندینجاریش لەسەر ئاستی ناوخۆو وڵاتانی ئەوروپی هەوڵی ئازادكردنی دراوە، بەڵام دەسەڵاتدارانی توركیا ئازادیان نەكردووە.

پەخشی راستەوخۆی رادیۆ پۆلەتیک