پۆڵەتیك پرێس
نوسینگەی ڕاوێژکاری ئاسایشی نەتەوەیی عێراق رایگەیاند، قاسم ئەعراجی لەگەڵ ماتیو تۆلەر باڵیۆزی ئەمریکا لە عێراق وتووێژی کردووە دەربارەی مەترسییەكانی کەمپی هۆڵ لە سوریا و تاوتوێی ئەو پرسەیان كردووە.
نوسینگەی قاسم ئەعراجی ڕاوێژکاری ئاسایشی نەتەوەیی عێراق بڵاویكردەوە، باڵیۆزی ئەمریکا سوپاسی حکومەتی عێراقی کردووە لە هەوڵەکانی بۆ نزیککردنەوەی بۆچوونەکان و چارەسەرکردنی جیاوازییەکان و هەوڵدان بۆ سەقامگیری ئاسایش لە ناوچەکەدا .
ئاماژەی بۆ ئەوە شکردووە: “ویلایەتە یەکگرتووەکانی ئەمریکا بەدوای ئەوەدایە پەیوەندییەکانی لەگەڵ عێراق لە هەموو بوارەكاندا بەتایبەت کەلتوری و تەندروستی و هەروەها پەیوەندییە سیاسییەکان بەرەو پێش ببات”.
باڵیۆزی ئەمریکا ئامادەیی وڵاتەكەی دەربڕیوە بۆ پشتیوانی و هاوكاریكردنی عێراق بەتایبەت لەڕووبەڕووبوونەوەی پەتای كۆرۆنادا.
ئەوەشهاتووە،لە کۆبونەوەی نێوان ڕاوێژکاری ئاسایشی نەتەوەیی عێراق و باڵیۆزی ئەمریکا لە عێراق، هەردوولا باسیان لە بارودۆخی سیاسی و ئەمنی لەسەر ئاستی ناوخۆیی و نێودەوڵەتی کردووە بەتایبەت ئەو هەنگاوانەی لە دیالۆگی ستراتیژی نێوان ئەمەریكا و عێراقدا ڕێککەوتنی لەسەر کراوە.