پۆڵەتیک پرێس
ماتیۆ تۆلەر، باڵیۆزی ئەمریکا لەبەغدا ڕایگەیاند، ئەو چەکانەی بەکاردێن بۆ کردنەئامانجمان دروستکراوی ئێرانن.
تۆلەر جەختی لەوەکردەوە، ئەو ئەجێندایەی میلیشیاکان لەعێراق کاریپێدەکەن ئەجێندای سوپای پاسدارانە و وتیشی: چالاکی ئەو میلیشیایانە دەسەڵاتی عێراق لاوازدەکات.
لەماوەی ڕابردوودا چەندینجار باڵیۆزخانەی ئەمریکا لەبەغدا و ئەو بنکانەی عێراق کە ئەمریکییەکانی تێدایە لەڕێی موشەکی میلیشیاکانەوە کرانەئامانج و لایخۆیەوە تۆلەر ئیدانەی کردەوە میلیشیاییەکانی دژ بە هەرێمی کرد.
لەبارەی پەیوەندییەکانی عێراق و ئێرانەوە تۆلەر ئاماژەی بەوەکرد، ئەمریکا نایەوێت پەیوەندی نێوان ئەو دوو وڵاتە بپچڕێت، بەڵکو تەنیا پێویستە ئەو پەیوەندییە لەسەر بنەمای ڕێزگرتن لە سەروەری هەردوو وڵات بنیادبنرێت و دەستوەرنەدەنە کاروباری یەکتر.
لەبارەی مانەوەی ئەمریکییەکان لەعێراق وتی: باڵیۆزخانەی ئەمریکا لەعێراق داناخرێت، بەڵام هیچ نیازێک نییە بۆ زیادکردنی هێزەکانمان لەعێراق و لەئێستاشدا ژمارەی سەربازەکانمان کەمتر لە دوو هەزار و 500 سەربازە.