وەزیری دەرەوەی ئێران گەشتە هەولێر

پۆڵەتیك پرێس

محەمەد جەواد زەریف، وەزیری دەرەوەی ئێران، گەیشتە هەولێری پایتەختی هەرێمی كوردستان.

لە فڕۆكەخانەی نێودەوڵەتی هەولێر، وەزیری دەرەوەی ئێران لە لەلایەن هەریەك لە قوباد تاڵەبانی، جێگری سەرۆكی حكومەتی هەرێم و رێبەر ئەحمەد، وەزیری ناوخۆو سەفین دزەیی سەرۆكی فەرمانگەی پەیوەندییەكانی دەرەوەی هەرێمی كوردستان و چەند بەرپرسێكی دیكە پێشوازی لێكرا.

سەردانەكەی زەریف، دوای ئەوەدێت رۆژی 26 ی نیسان گەشتە بەغدا و لەگەڵ بەرپرسانی باڵای عێراق كۆبووەوە، بڕیارە لەسەردانەكەیدا بۆ هەولێر لەگەڵ بەرپرسانی باڵای هەرێم كۆببێتەوە.

نازم دەباغ نوێنەری حكومەتی هەرێم لە تاران بە پۆڵەتیك پرێسی راگەیاند: سەردانی وەزیری دەرەوەی ئێران بۆ هەرێمی كوردستان پەیامی بەردەوام بوونی پەیوەندییەكان و پەیامی گرنگی پێگەی هەرێمی كوردستان لە پەیوەندییە نێودەوڵەتی و ناوچەییەكان دەگەیەنێت.

نوێنەری حكومەتی هەرێم لە تاران وتی: سەردانی وەزیری دەرەوەی ئێران لە رێگەی بەغداوە بۆ هەرێمی كوردستان بەڵگەی ئەوەیە كە هەرێم و بەغدا و ئێران لە پەیوەندییەكی باشدان.

محەمەد جەواد زەریف بەر لەوەی بگاتە عێراق، رۆژی 25_4_2021 سەردانی وڵاتی قەتەری كرد.

پەخشی راستەوخۆی رادیۆ پۆلەتیک