بەغدا و هەرێم لەسەر ئاستی عێراق کەمترین ڕێژەی هەژارییان تێدایە

پۆڵەتیک پرێس

وەزارەتی پلاندانانی عێراق ڕایگەیاند، ڕێژەی هەژاری باڵا لەعێراقدا %2ی کۆی گشتی ئاستەکانی هەژاری تێناپەڕێنێت و زۆرترین ڕێژەی هەژاریش لەپارێزگای موسەنا هەیە و کەمترین ڕێژەش بەر هەرێم و بەغدا دەکەوێت.

لەوبارەیەوە عەبدولزەهرە هنداوی، وتەبێژی وەزارەتی پلاندانان ڕایگەیاند، هەژاری باڵا و مەترسیدار لەعێراق لەئاستێکی نزمدایە و %1.5 بۆ %2ی کۆی ڕێژەی هەژاری کە %30ی دانیشتووانە، پێکدەهێنێت.

وتیشی: وەزارەت کار بۆ نوێکردنەوەی داتاکانی دەکات بەمەبەستی زانینی ئاستی هەژاری لەساڵی 2021.

بەپێی قسەی ئەو وتەبێژە، ئاستی هەژاری لەهەرێم و بەغدا لەنێوان %12.5 بۆ %13ی دانیشتووانە و ئەمەش لەچاو پارێزگا و ناوچەکانی دیکەی عێراق ڕێژەیەکی نزمترە.

لەماوەی ڕابردوودا ڕێکخراوی یونسێفی سەربە نەتەوەیەکگرتووەکان ڕاپۆرتێکی بڵاوکردەوە تیایدا دەرکەوت، زیاتر لە %40ی منداڵانی عێراق لەژێر هێڵی هەژاریدا دەژین.