نێچیرڤان بارزانی: ئەو نەوەیەی لە عێراقدا دروستبووە ئامادەیە بۆ گۆڕانكاری

ئەم بابەتە 49 جار بینراوە

پۆڵەتیك پرێس

سەرۆكی هەرێمی كوردستان رایگەیاند، نەوەیەكی نوێ لە عێراق دروست بووە، كە نەوەی 10 ساڵ پێش ئێستا نیە و دروشمی بێناوەڕۆك قبوڵناكات و ئامادەی گۆڕانكارییە.

نێچیرڤان بارزانی، سەرۆكی هەرێمی كوردستان لە چاوپێكەوتنێكیدا لەگەڵ كەناڵی شەرقییە كە شەوی رابردوو پەخشكرا باسی لە چەند تەوەر و بابەتێك كرد و پەیوەست بە پەیوەندییەكانی نێوان هەرێم و بەغدا وتی: هەر لە سەرەتاوە بڕوامان وابووە چارەسەركردنی پرسی كورد دەبێت لە چوارچێوەی عێراقدا بێت.

نێچیرڤان بارزانی لەو چاوپێكەوتنەیدا باسی ئەوەیكرد، هەر یەك لە هەرێمی كوردستان و عێراق لە ڕابردوودا هەڵەیان كردووە، لەدوایین سەردانی بۆ بەغدا پەیامەكەی ئەوەبووە ئێمە و ئێوەش هەڵە بووین، وەرن با دانیشین و ژیانێكی باش بۆ هەمووان دروستبكەین.

لەو چاوپێكەوتنەدا سەرۆكی هەرێم رەتیكردەوە ئیسرائیل بنكە و بارەگای موخابەراتی لە هەرێمدا هەبێت.

ئەم قسانەی سەرۆكی هەرێم لە كاتێكدایە ماوەی زیاتر لە شەش ساڵە پەیوەندییەكانی هەرێم و عێراق ئاڵۆزی تێكەوتووە و چارەسەركردنی كێشەكان لە نێوان هەردوولا وەك مەحاڵی لێهاتووە.

پەخشی راستەوخۆی رادیۆ پۆلەتیک