داوای راگرتنی کوشتنی ژنان  دەكرێت

پۆڵەتیك پرێس

له‌ژێر ناو نیشانی كوشتنی ژنان ڕاگرن ژمارەیەكی بەرچاو لەرێكخراوەكانی ژنان و مافی مرۆڤ و چالاكوانان و رۆژنامەنووسان نامه‌یه‌ك ئاراسته‌ی سه‌رۆكی حكومه‌ت و جێگره‌كه‌ی ده‌كه‌ن و داوای راگرتنی كوشتنی ژنان و سزادانی ئەو کەسانە دەکەن کە کچانی خوار تەمەنی ١٨ ساڵ ناچار بە هاوسەرگیری دەکەن.

لە راگەیەندراوێكدا ئەو رێكخراو چالاكوان و رۆژنامەنووسانە ئاماژە بەوەدەكەن، لە ماوەی دوو مانگی ڕابردوودا زیاتر لە سێ ژن لە لایەن کەسانی نزیکی خۆیانەوە كوژراون، هاوكات دیاریش نیە چەند ژنی تر لەژێر هەڕەشەدان و چەند ژنی دیکەش کوژراون و کوشتنەکەیان بە شاردراوەیی ماوەتەوە بۆیە ئەوان داوا و فشارەکانیان بۆ حكومەت ولایەنە پەیوەندیدارەكان بە ئاڕاستەی دەستگیرکردن و سزادانی بکوژانە

باس لەوەشدەكەن، کارەساتەکانی کوشتنی ژنان هەر بەردەوامە بۆیە ئەوان نیگەران و توڕەشن لەو بارودۆخە سەختەی ژیانی تاکەکان بە تایبەتی ژنان و بە ئەرکی حکومەتی دەزانن کە هەستێت بە دەستگیرکردن و بە سزا گەیاندنی ئەو کەسانەی ڕاستەوخۆ و ناڕاستەوخۆ بەشدارن لە کوشتنی كچان و ژنان و  سزادانی ئەو کەسانەی بەشدار و بکەری هەرجۆرێک لە جۆرەکانی توندوتیژین بەرامبەر تاکەکانی کۆمەڵگە هاوكات داوای بەهێزکردنی دام و دەزگاکانی لێکۆڵینەوە و بەدواداچوون و جێبەجێکردنی یاساکان دەكەن.

لەراگەیەندراوەكەدا ئەو رێكخراوانە داوای بەهێزکردن و پشتگیری کردنی خانەکانی داڵدەدانی ژنان و باشکردنی میکانیزمەکانی داڵدەدان و گرنگیدان و بەهەندوەرگرتنی دۆسیەکانی توندوتیژی بەرامبەر بە ژنان لە لایەن دەزگا پەیوەندیدارەکانەوە دەكەن.

ئاماژەش بەوەدەكەن، زۆربەی کوشتنەکان ئەو واقیعە تاڵە دەردەخات کە لەم کۆمەڵگایەدا ژنان ژیان و کەرامەتیان پارێزراو نیە، هێشتا بکوژان لەو باوەڕەدان کە دەتوانن بێ سزادان لە تاوانەکانیان دەربچن ئەوەش ئاماژەی ڕاستەقینەی ئەو مەترسیە گەورەیەیە کە لەسەر ژیانی تاکەکانی کۆمەڵگه هەیە.