پۆڵەتیک پرێس
هێزە سیاسییەکان و شەقامی عێراق نزیکدەبنەوە لە خولی سێیەمی دیالۆگی ستراتیژی نێوان ئەمریکا و عێراق.
میدیاکانی عێراق بڵاویانکردەوە، بڕیارە ئەمڕۆ چوارشەممە خولی سێیەمی دیالۆگی ستراتیژی نێوان ئەمریکا و عێراق لەڕێی ڤیدیۆ کۆنفرانسەوە بەڕێوەبچێت و هەردوولا تاوتوێی دۆسیەکانی ئەمن و روبەڕوبوونەوەی تیرۆر بکەن.
هاوکات، بڕیارە لەو کۆنفرانسەدا ئەمریکا و عێراق گفتوگۆ لەسەر بابەتە ئابوری و سیاسییەکان و هەماهەنگی لە بوارە پەروەردەیی و کولتورییەکاندا بکەن.
لەوبارەیەوە ئەنتۆنی بلینکن، وەزیری دەرەوەی ئەمریکا لە تویتێکدا رایگەیاند، “چاوەڕوانم لە چوارچێوەی گفتوگۆی ستراتیژی نێوان ئەمریکا و عێراق، لەگەڵ فوئاد حسێن، هاوتا عێراقییەکەم تاوتوێی پەیوەندییە ستراتیژییەکانمان لە سەرجەم بوارەکاندا بکەین”.
ئەم گفتوگۆ ستراتیژییە لە کاتێکدایە، لە پەرلەمانی عێراق داواکارییەکان بۆ یەکلاکردنەوەی چوونەدەرەوەی هێزە بیانییەکان لە وڵاتەکە لە زیادبووندایە.