سەردەمی نا بەرپرسیاری میدیایی كەی تەواودەبێت؟

ئەم بابەتە 95 جار بینراوە

هەركەس ئەتوانێت مۆبایل و لاپتۆپێكی هەبێت یان ئەگەر هیچیشیانی نەبێت؛ ببێتە خاوەنی دەزگاو ئاژانسێكی بەناوی میدیایی.. بەڵام بە پێوەری ئەم سەردەمەی كاری رۆژنامەنوسی كە بەسەردەمی “درۆ و چەتەگەری میدیایی نێوزەند دەكرێت”..!

بەداخەوە لە چییەوە هاتوینەتە سەرچی! لەباتی ئەوەی بەرەو پێش هەنگوبنێین و ئەزمونی بونیادنەرانە بخەینە سەریەك و بەرپرسانەو پیشەییانە كاری رۆژنامەڤانی بكرێت، كەچی لە ناودارانی وەك خوالێخۆشبوان (میقداد مەتحەد بەدرخان و پیرەمێرد و ئیبراهیم ئەحمەد و عەلادین سجادی..هتد.

هاتوینەتە سەرچی؟!
ئێستا ئێمە لەم كۆمەڵگەیە دا، لە خراپترین سەردەمی بواری رۆژنامەگەری زەرد و “سەحافەی درۆ و دەلەسەو هەواڵی بێ ناوەڕۆك و زانیاری گەڕكردن بەخەڵك و دەستوەردان لە ژیانی تاكەكەسیداین” كەئەمەش هاوشانی گەندەڵییە كە كۆمەڵ دادەڕزێنێت و لەنێوی دەبات.

سەرباری ئەوە بەشێك لە رۆژنامەنوسان بە ئاراستەی چەتەگەری پیشەكەیان بەكاردەهێنن بۆ ژەهر رشتن و دادۆشینی خەڵك و كەسانی دیارو خاوەن پارە!

ئەم سەردەمی ئێستا؛ بەخراپترین سەردەمی میدیایی ئاناشیزم دادەنرێت، كە لایك و كۆمێنت و سەیركەر بۆتە ناوەرۆكی پەیامی میدیایی و خەڵەتاندنی بینەرو وەرگری كوردی هەرلەبەر ئەوەش ئەم جۆرە لە میدیا بەردەوام لەدۆخی پۆزشدایە و ئەو چوارچێوەیە تێپەڕناكات.

لەباتی ئەوەی كار بۆ ناوەڕۆكی پەیام بكات و وردبینی لەگەیاندن رەچاوبكرێ.

كەچی هەركەس لە ئاوازێك ئەژەنێت! كەس خەمی زانیاری دروستی نییە، بەشێكی زۆری میدیاكان لەناو سۆشیال میدیا مۆڕاڵیان لەدەستداوەو رەچاوی ئیتیكی كاری رۆژنامەگەری ناكەن یان هەر لێی نازانن و پێشبڕكێكە لەسەر زۆری لایك و كۆمێنتە؛ گوێ بە كوالێتی پەیام نادەن و لایان گرنگ نییە كە زانیاری وورد و درشت و راست و راشكاو بگەیەننە وەرگر، بەداخەوە پڕوپاگەندە، بۆتە چەقی كاركردنی بەشێكیان. دەكرێت بوترێت لر خراپترین سەردەمی كاری میدیایداین و لایك و كۆمێنتە ئاراستەی پەیامی میدیایی دەكات.

رێبین عومەر

پەخشی راستەوخۆی رادیۆ پۆلەتیک