مردنێكی پڕ لەمشتومڕ

ئەم بابەتە 80 جار بینراوە

پۆڵەتیك پرێس: لاڤە واحید
كۆچی دوایی نەوال سەعداوی، ژنە نووسەری میسری كاردانەوەی ژمارەیەكی زۆر لەلایەنە ئیسلامییە توندڕەوەكانی لێكەوتەوە بەجۆرێك لەتۆڕە كۆمەڵایەتییەكان بەشێوەیەكی ئاشكرا دڵخۆشی خۆیان دەربڕی لە ئاست مردنەكەی.

فاتمە ناعوت، ژنە نووسەرێكی میسرییە و لەبارەی كاردانەوەكانی مردنی نەوال سەعداوی باس لەوە دەكات، هەڵوێستی گروپە ئیسلامییە توندڕەوەكان لەبارەی مردنی نەوال سەعداوی تەنیا پەیوەندی بەو جیاوازییەوە نەبوو، كە لەسەر ئاستی بیركردنەوەو ئایینی لەگەڵ ئەو ژنە نووسەرە هەیانبوو، بەڵكو پەیوەندیشی بەهەڵوێستەكانی نەوالەوە هەبوو، كە چەندین جار بە بەڵگە قسە نادروست و رەفتارە رەتكراوەكانیانی ئاشكرادەكرد.

بەپێی قسەی ناعوت، نەوال سەعداوی لەچوارچێوەی كەسە یەكەمینەكاندا بوو، كە داوای نوێكردنەوەی ئایینی كرد و پێیوابوو سەرجەم ئایینەكان پێویستیان بەنوێكردنەوەیە نەك بەتەنیا ئایینی ئیسلام، وەك چۆن بڕواشی وابوو، ئەم ئەركە تەنیا لەڕێی سەرۆك و زانا ئایینییەكانەوە جێبەجێناكرێت، بەڵكو پێویستی بەگەل و چینی دەستەبژێرە.

ناعوت دەشڵێت: ئەم بیرۆكەیە یەكێك بوو لەو هۆكارانەی كۆمەڵە توندڕەوەكانی توڕە كرد و پێیانوابوو ئەمە لادانە لە بنەما ئایینییەكان‌و هەوڵە بۆ گۆڕینی بیروباوەڕە جێگیرەكان، بەڵام نەوال سەعداوی هەمیشە بە بیروبۆچوونی بەهێز وەڵامی ئەم مشتومڕانەی دەدایەوە.

نەوال سەعداوی رووبەڕووی دیاردەی خەتەنەكردنی كچان بووەوە

لە بەشێكی دیكەی قسەكانیدا ناعوت ئاماژەی بەوەكرد، نەوال سەعداوی رووبەڕووی دیاردەی خەتەنەكردنی كچان بووەوە لە میسڕ و سوربوو لەسەر ئەوەی ئەمە تاوانە و پێشێلكارییە بۆسەر جەستەی ژن و هیچ پاڵپشتییەكی قورئان و سونەتی لەپشت نییە و تەنیا بۆ مەبەستی پاسەوانیكردنی ژنان و جەستە و عەقڵیان ئەنجام دەدرێت، نەوال لە نووسراوێكدا باس لەو كاتە دەكات، كە لە گوندێكی میسر پزیشك بوو.

ئەو دەڵێت: ئەو تاوانە زۆرجار بەرانبەر كچەكان ئەنجام دەدرا و كێشەی دەروونی بۆ دروستدەكردن.

نەوال لە هەڵمەتەكانی بەردەوام بوو هەتا دەسەڵاتدارانی میسر وەڵامی داواكارییەكانیان دایەوەو یاسایەكیان بۆ قەدەغەكردنی خەتەنەی كچان دەركرد، لەدوایین هەمواركردنەوەی یاساكەشدا سزاكەیان گەیاندە 20 ساڵ زیندانی، ئەو رۆژەی یاساكە هەمواركرایەوە هاوكات بوو لەگەڵ كۆچی دوایی نەوال.

لایەنە ئیسلامییە توندڕەوەكان دژی هەڵمەتەكانی نەوال سەعداوی بوون

لەلایەكی دیكەوە نوعات باس لەوە دەكات، لایەنە ئیسلامییە توندڕەوەكان دژی هەڵمەتەكانی نەوال سەعداوی بوون، كە دژی پەچەكردنی ژنان ئەنجامیدەدا، چەندین جاریش هەوڵیاندا ناو و ناوبانگی بشێوێنن بەهۆی هەوڵەكانی لە بواری مافەكانی ژنان و یەكسانی لەگەڵ پیاو، بۆیە چەندین جار ئەو كۆمەڵە توندڕەوانە سكاڵایان دژی تۆمار كردووەو ویستوویانە لە هاوسەرەكەی جیای بكەنەوە، جگە لەمانەش هەڕەشەی كوشتنیان لێكردووە، دواتر بە ناچاری بۆ ماوەیەك میسری بەجێهێشتووە.

وفاة الكاتبة نوال السعداوي عن عمر ناهز 90 عاما - RT Arabic

نوعات باس لەوە دەكات، هەوڵدرا ناسنامەی میسری لەنەوال بسەندرێتەوە، بەڵام لە 12ی ئایاری ساڵی 2008 دادگای دادی ئیدارەی ئەنجوومەنی دەوڵەت رەتیكردەوە ناسنامە لە نەوال بسەنرێتەوە، بە قسەی نوعات، ئەوەی بووەتە مایەی بێزاری و نیگەرانی كۆمەڵە توندڕەوەكان بەجۆرێك بە زیندوویی و مردوویی دەیانەوێت ناوبانگی نەوال بشێوێنن دەگەڕێتەوە بۆ بەرگرییەكانی لە ئەخلاق و شەرەف بەجۆرێك “درۆ”و ناڕاستییەكانی ئەو كۆمەڵانەی ئاشكرا كرد و وتی: مرۆڤ پیاو بێت یاخود ژن، خاوەنی عەقڵە و ناتەواو نییە و خوا هیچ بوونەوەرێكی بە ناتەواوی دروست نەكردووە.

نوعات لەكۆتایی قسەكانیدا ئاماژە بەوە دەكات، نەوال سەعداوی مەشخەڵی رووناكبیری هەڵكردو رووبەڕووی بیروبۆچوونە تاریكەكان بووەوە و بەرگری لە مافەكانی ژنان كرد لەپۆشینی پەچە یاخود لابردنی، نەوال دەیوت: مەرج نییە پەچەكردن هێما بێت بۆ رەفتاری ژنان.

زۆرێك لەو كەسانەی هێرشیان كردەسەر نەوال سەعداوی، تەنانەت كتێبێكی ئەو ژنە نووسەرەیان نەخوێندووەتەوە

نوعات دەشڵێت: زۆرێك لەو كەسانەی هێرشیان كردەسەر نەوال سەعداوی، تەنانەت كتێبێكی ئەو ژنە نووسەرەیان نەخوێندووەتەوە و پەیوەستن بە پێوەرەكانی نەزانی و تێنەگەیشتنی دروست لە ئایین و فێركارییەكانی.

پەخشی راستەوخۆی رادیۆ پۆلەتیک