خەونی دۆستایەتی كورد لەهەناوی ناسیۆنالیستی توركیدا

كام تاكی تورك لە مەرتەبە نەتەوەیی و ناسیۆنالیستییەكەیدا خانەی ژێرەوەی توندڕەوی و ڕایسیزم و جیاوازی نەتەوەیی گرتبێت، ئەوا لە ئاست نەتەوەی كورددا هیچ جیاواز نییە لەو توركەی لە مەرتەبەی یەكەمی فاشیستی توركی و ناسیۆنالیستی توركیدایە.

گەڕان بەدوای جیاوازیدا لەنێوان تاكی توركیدا دژی میللەتی كورد و خاك و دۆزە ڕەواكەی، تێنەگەشتنە لە توندی بیری ناسیۆنالیستی و فاشیستی توركی لەناخی هەر تاكێكی توركدا. جا چجای ئەوەی بگاتە ڕادەیەك پێمانوابێت تورك دۆستی كوردە و قازانجی كوردیان دەوێت!

ئەوەی پێویستە هەموو كوردێك بیزانێت، هەڵكشان و داكشانی نەیارێتی تورك دژی كورد بەپێی “زەمەن”و “شوێن”، جیاوازەو هەرگیز توركێك نییە لە دەرەوەی بیری فاشیستانەی تورك بێت و دۆستی كورد بێت. كاتێك “دەوڵەت باخچەلی” سەرۆكی پارتی بزوتنەوەی نەتەوەپەرستی تورك “مەهەپە” لەسەر (پول)ێك هێرش دەكاتەسەر كورد و خاكەكەی، ئەوە تەنها پەیامی سەرۆكی مەهەپە نییە وەك هێزێكی نەتەوەپەرستی توركی، بەڵكو لەپشتەوەی ئەم هێرش و هەڕەشەیەوە هەموو توركێك خۆی دەبینێتەوە و كۆكە بەئاواز و نۆتی توڕەبوونەكانی باخچەلی. خیتابەكانی باخچەلی ئەگەر لە سیاسەتی ناوخۆییدا تەنها نمایندەی یەك حیزب بكات، ئەوا بۆ نەیارەكانی دەرەوەی توركیا هێزی ناوەوەی هەموو توركێكە و هەموو توركێك بۆ خۆیان باخچەلییەكی دیكەن.

ناسیۆنالیستی توركی و فاشیسزمی توركی كۆلكەو خاڵی هاوبەشی نێوان هەموو توركێكە بەبێ جیاوازی، لەكاتێكدا ئەحمەد داود ئۆغڵۆ و عەلی باباجان لەهەناوی حیزبی “دادو گەشەپێدان”ەوە هاتوونەتە دەرەوە و حیزبێكی نوێیان ڕاگەیاندووە و عەلی باباجان ڕایگەیاند كە “ئەردۆغان توركیای بردۆتە تونێلێكی تاریك” و هاوكات باباجان و ئەحمەد داود ئۆغڵۆ یەكەم كۆنگرەی حیزبەكەیان بردووەتە باكوری كوردستان بۆ ئەوەی دەنگی AKPARTI كەم بكات، بەڵام لە هێرشی فاشیستانەی ئەردۆغاندا بۆسەر كوردانی باشووری كوردستان، پێكەوە كۆك بوون و باباجان و داود ئۆغڵۆ پشتیوانی ئەردۆغانن. ئەمە جگە لەوەی باخچەلی دەڵێت “نەخشەی كوردستان لەژێر پێی ئێمەدایە”

لێرەدا، دەبێت دوو شت لێكدی جودا بكرێتەوە، یەكەمیان خودی پولەكەیە كە بەڵگەی بەرزبوونەوەی كێرڤی نەتەوەیی نییە و شتێكی هێندە گەورە و پیرۆزنییە تەكانێك بە بەپرسی نەتەوەیی كورد بدات، ئەم خاڵەیان تووشی شاگەشكەم ناكات و پولەكە بەلای منەوە پولێكی قەڵب ناهێنێت. دووەمیان گرنگ و مایەی هەڵوەستەیە كە، ناسیۆنالیستی عەرەبی و توركی و فارسی، هیچ شتێكی كوردی نییە دژی نەوەستابێتنەوە، ئەم نەتەوەپەرستییەی توركیش لەناو جۆرەكانی دیكەدا پلەی یەكەمی وەرگرتووە لەدژایەتی هەموو پیرۆزی و بەها و خاك و زمان و ….هتدی كوردی.

پەینەبردن بە قوڵایی توندیی و داخراویی ناسیۆنالیستیی توركی، ئەو بڕوایەی لەلای هەندێك كاربەدەستی كورد دروست كردووە كە تورك وەك دۆست و نزیك لەكورد پیشان بدەن، لەڕاستیدا ئەم جۆرە بڕوایە دووجار هەڵەیە، لەلایەك ناسیۆنالیستی توركی ئەوەندە توند و پڕ قینە دژی كورد بەگشتی، ڕێگە بەخۆی نادات لەهەناوی خۆیدا جیگایەك بۆ دۆستایەتی لەگەڵ كورد بكاتەوە و ئەخلاق! بگێڕێتەوە بۆ پەیوەندییەكی لەو شێوەیە. لەلایەكی دیكەشەوە ئەم دژایەتییەی تورك بۆ كورد شتێك نییە لەماوەی دەیەیەك یان دووان و سیانی ڕابردووەوە سەریهەڵدابێت، بەڵكو ئەم دژایەتییە لە شێخ عوبەیدوڵڵای نەهری و شێخ سەعیدی پیرانەوە تاكو ئێستا هەمان وێنەی مێژووییە كە مێژوویەكی پڕ كوشتار و دژایەتی كوردبووە لەلایەن توركەوە.

ناوهێنانی تورك وەك دۆست، قسەیەكە لە دەرەوەی مێژووە و جۆرێكیشە لە ناشارەزایی لەسیاسەت، و زیگزاك و تەراتێنی ئابووری كە توركیا هەمیشە لە سێبەری ئابووریدا لەگەڵ كورد و عەرەبی عێراقیش دانیشتووە، تەنانەت لەدوای ساڵی 1926 توركەكان ڕازیبوون ئەگەر ڕێژەی 10%ی نەوتی موسڵ بۆ ماوەی 25 ساڵ وەربگرن، ئەوا لە دروشمی موسڵ ویلایەتێكی عوسمانییە و “نیشتمانی ونبوو”ە، خۆش دەبن.

ئازاد ئیبراهیم ئەحمەد

قەیوان گروپ

 


مایۆرکا سیتی جوانییەک لە دڵی سروشتدا