منداڵانی سوریا نایانەوێت بگەڕێنەوە وڵاتەکەیان

پۆڵەتیک پرێس

رێکخراوی “سەیڤ زە چیڵدرن” هۆشداریدا لەبارەی ئەوەی زۆرێک لەو منداڵانەی سوریا کە شەڕ ناچاری راکردنی کردوون نایانەوێت بگەڕێنەوە وڵاتەکەیان.

لەوبارەیەوە جێریمی ستۆنەر، بەڕێوەبەری نوسینگەی هەرێمیی رۆژهەڵاتی ناوەڕاست و رۆژهەڵاتی ئەوروپا لە رێکخراوەکە رایگەیاند، 10 ساڵ شەڕی ناوخۆی سوریا منداڵی لە منداڵانی ئەو وڵاتە زەوتکرد، بەڵام پێویستە جیهان رێگە نەدات داهاتووشیان بفەوتێت.

رێکخراوەکە راپرسییەکی ئەنجامدا تیایدا هەزار و 900 منداڵ و بەخێوکەرەکانیان لەناو ئاوارەکانی سوریا و پەنابەرانی سوری لە وڵاتانی دیکەی وەک ئوردن و لوبنان و تورکیا و هۆڵەندا بەشداریان تێداکرد.

لە راپرسییەکەدا دەرکەوت، %80ی منداڵە سورییە پەنابەرەکان نایانەوێت بگەڕێنەوە بۆ سوریا، لە هەر سێ منداڵێکیش، یەکێکیان پێی باشترە لە دەرەوەی وڵاتەکەی لە ژیان بەردەوام بێت.

لە مانگی ئاداری ساڵی 2011ەوە لە سوریا شەڕ و ناکۆکی بەردەوامە و بەهۆیەوە 387 هەزار تا ئێستا کوژراون.

بەپێی داتاکانی نەتەوەیەکگرتووەکان، لە ئێستادا، %60ی منداڵانی سوریا بەهۆی نەبوونی ئاسایشی خۆراکەوە دەناڵێنن و زیاتر لە نیوەیان بەهۆی هەژارییەوە توانای خوێندنیان نییە.