داعش چالاك دەبێتەوە

ئەم بابەتە 152 جار بینراوە

پۆڵەتیك پرێس: نیگار عومەر
چەكدارانی داعش ماوەی مانگێك دەبێت جموجۆڵەكانیان لەسنوری قەزای خانەقین زیادكردووەو چەندین هێرش و پەلاماری چەكداریان ئەنجامداوە بۆ سەر هێزەكانی سوپای عێراق، بەرپرسانی هێزەكانی پێشمەرگەش دەڵێن زیادبوونی جموجوڵەكانی داعش دەگەڕێتەوە بۆ ئەو ئۆپراسیۆنانەی هێزە عێراقییەكانی لەماوەكانی ڕابردوودا ئەنجامیان دابوو.

بەقسەی بەرپرسانی هێزەكانی پێشمەرگە، ئەو جموجوڵانەی داعش وەك كاردانەوەیەكە بەرانبەر هێزە عێراقییەكان، كە ئەنجامی دەدەن، جگە لەوەش بۆشایی ئەمنی لەنێوان هێزی پێشمەرگەو هێزە عێراقییەكاندا دروستكردووە.

دلێر شكور، فەرماندەی لیوای سێی هێزەكانی پێشمەرگە لەسنوری خانەقین لەو بارەوە بۆ پۆڵەتیك پرێس دەڵێت: داعش بۆ ماوەی مانگێك دەبێت جموجۆڵەكانی لەناوچەكانی حەوزی دیالە و چەمی سیروان و گوندەكانی سنووری خانەقین زیاد كردووە.

زۆر جار داعش ئەم پیلانە بەكار دێنێت و خۆی ڕێكدەخاتەوە

دلێر شكور وتیشی: زۆر جار داعش ئەم پیلانە بەكار دێنێت و خۆی ڕێكدەخاتەوە بۆ هێرشكردن وەك كاردانەوەیەك بۆ ئەو ئۆپراسیۆنانەی هێزە عێراقییەكان ماوەیەكە دەستیان پێكردووە لەم سنوورە، بۆیە دێن و هێرشی چەكداری ئەنجام دەدەن، جگە لەوە هێڵێكی تەماس لەنێوان ئێمە و سوپای عێراقدا هەیە و داعش سود لەو بۆشایە ئەمنییە وەردەگرێت و دێتە ناوچەكە و كردەوەكانیان ئەنجامدەدەن و دەگەڕێنەوە بۆ ناچەكانی حەوزی حەمرین.

ژمارەی چەكدرانی داعش لەو سنوورە نزیكە لە 30 چەكدار، كە بەشێوەی مەفرەزەی بچووك لەنێو باخ و ناوچە چرەكانی چەمی سیرواندا دەمێنەوە.

ئەو فەرماندەی پێشمەرگە ئەوەش دەڵێت: ئێمەش وەك هێزەكانی پێشمەرگە چاودێری جوڵەكانیان دەكەین و سنووری خۆمان دەپارێزین لەحاڵەتی ئامادە باشیداین، بەڵام پێمان وایە دوای پەلاماردانی هێزەكانی سوپای عێراق هێرش بۆ سەر هێزەكانی ئێمەش ئەنجام بدەن.

ماوەیەكە هێزەكانی پێشمەرگە هۆشداری لەمەترسی جموجۆڵەكانی داعش دەدەن‌و پێیان وایە، داعش هێرشی چەكداری بۆسەریان ئەنجام دەدات.

ماوەیەكە هێزەكانی پێشمەرگە هۆشداری لەمەترسی جموجۆڵەكانی داعش دەدەن

رائید محەمەد قادر، لە لیوای پێنی پیادە هێزەكانی پێشمەرگەی هەرێمی بەپۆڵەتیك پرێس-ی ڕاگەیاند، ئەو سنوورە، كە لەژێر دەسەڵاتی ئێمەدایە نزیكی كوڵەجۆ بۆ گوندەكانی سنوری خانەقین دەگرێتەوەو هیچ هاوكاری و هەماهەنگییەك لەنێوان ئێمە و سوپای عێرقدا نییە و لەو ئۆراسیۆنەشدا ئەنجامیان دابوو داوای هاوكاریان لەئێمە نەكرد.

وتیشی: لەم ماوانەشدا چەكدارانی داعش هەندێك كات نزیك دەبوونەوە لەهێزەكانی پێشمەرگە، بەڵام ئێمە لەتەواوی ئامادە باشیدا بووین.

چەكدارانی داعش لەو سنوورەدا چەكی قورسیان پێیە و بەشێوەی گروپ گروپ دابەش بوون، هەروەها بەشێك لە مەفرەزەكانیان چەكی قەناسیان پێیە، كە بەشەو بەكاری دێنن بۆ كردەوە تیرۆستییەكانیان.

دانیشتوانی سنوورەكە لە دۆخێكی نارامدا دەژین

لای خۆیشییەوە شەماڵ عەبدولڕەحمان، بەڕێوبەری ئاسایشی كوڵەجۆ بەپۆڵەتیك پرێسی وت: هێزە عێراقییەكان لەم ماوانەدا غەدرو زوڵمیان لەدانیشتوانی ئەو ناوچانە كردووە و چ بەرانبەر هاوڵاتیان، یاخود بەبڕینەوەی باخ و باخاتی گوند نشینەكانی سنوری خانەقین، ئەمەش نیگەرانی دانیشتوانەكەی لێكەوتووەتەوە.

ئەو بەرپرسەی ئاسایش وتیشی: دانیشتوانی سنوورەكە لە دۆخێكی نارامدا دەژین و خەڵكە پێویستی بەوەیە، بە ئارامی لەشوێنی خۆیدا بمێنێتەوە.

پەخشی راستەوخۆی رادیۆ پۆلەتیک