تورکیا هۆشداری دەداتە یۆنان

ئەم بابەتە 143 جار بینراوە

پۆڵەتیک پرێس

خوڵوسی ئاکار، وەزیری بەرگری تورکیا هۆشداریدایە یۆنان لە بەکارهێنانی زمانی هەڕەشە دژی وڵاتەکەی.

میدیاکانی تورکیا بڵاویانکردەوە، خوڵوسی ئاکار هۆشداری داوەتە یۆنان لە بەکارهێنانی زمانی هەڕەشە دژی وڵاتەکەی و جەختی لەوەکردەوە ئەنقەرە دەیەوێت لە چوارچێوەی یاسای نێودەوڵەتییەکان و گفتوگۆ و پەیوەندی دراوسێیەتی کێشەکانی لەگەڵ ئەسینا چارەسەر بکات.

ئاماژەی بەوەشکرد، تورکیا داوا لە یۆنان دەکات سەرجەم ئەو رەفتار و گوفتارانە وەلاوەبنێت کە دەبنەهۆی زیادکردنی ناکۆکی و بەشێوەیەکی نەرێنی کاریگەری لەسەر سەقامگیری ناوچەکە دادەنێن.

خوڵوسی ئاکار دووپاتی کردەوە تورکیا هیچ نیازێکی نییە خاک و مافی هیچ کەس زەوت بکات، بەڵکو تاکە ئامانجی بریتییە لە پارێزگاریکردن لە سەروەری و بەرژەوەندییەکانی لە چوارچێوەی یاسا.

ماوەی چەندین مانگە تورکیا لە رۆژهەڵاتی ناوەڕاست سەرقاڵی دۆزینەوەی سەرچاوەکانی وزەیە لەناو ئەو ئاوانەی یۆنان و قوبرس بە بەشێک لە مافەکانی خۆیانی دەزانن.

لەلایەکی دیکەشەوە یەکێتی ئەوروپا چەندین جار پاڵپشتی خۆی بۆ ئەو دوو وڵاتە دووپات کردەوە و رەخنەی لە تورکیا گرت و چالاکییەکانی بە نایاسایی لەقەڵەمدا و هەڕەشەی ئەوەی لێکرد ئەگەر لەم کارانە بەردەوام بێت ئەوا سزای بەسەردا دەسەپێنێت.

پەخشی راستەوخۆی رادیۆ پۆلەتیک