به‌رپرسێكی باڵای گۆڕان ده‌ستیله‌كاركێشایه‌وه‌

ئەم بابەتە 234 جار بینراوە

پۆڵەتیك پرێس
سەرۆکی فراکسیۆنی گۆڕان له‌ئه‌نجومه‌نی پارێزگای هه‌ولێر و ئەندامی جڤاتی نیشتمانی بزوتنەوەکە، دەستی لەکارکێشایەوە و رایگەیاند، “حزبێك نەتوانێت ڕیفۆرم و چاكسازی لەناوخۆی خۆیدا بكات، حەتمەن ناتوانێت ریفۆرم و چاكسازی لەدەرەوەی خۆیدا بكات”.

عەبدولڕەحمان موهەندیس، سەرۆکی فراکسیۆنی گۆڕان لەئەنجومەنی پارێزگای هەولێر لەڕاگەیەندراوێكدا ئاماژە بەوەدەكات، “پاش شكستهێنانی بزووتنەوەی گۆڕان لە هەردوو هەلبژاردنی ئەنجومەنی نوێنەرانی عیراق و پەرلەمانی كوردستان لە ساڵی ( 2018 )، لە كۆبونەوەی جڤاتی نیشتیمانیدا وتم، پێویستە دان بە شكستەكاندا بنێین و داوای لێبوردنیش لە خەلك و جەماوەری گۆڕان بكەین، ڕووی قسەكانم لە رێكخەری گشتی كردو داوام لێكرد دەست لەكار بكێشێتەوە لەگەڵ ئەندامانی خانەی ڕاپەڕاندن، ئامادەیی خۆشم نیشاندا بەیەكەوە لەگەڵ ئەوان دەست لەكاربكێشمەوە، بەڵام ئەوان نەیانكرد، هەروەها وەك فراكسیۆن داوامان كرد نەچینە ناو حكومەت لەجیاتی ئه‌وه‌ ناوماڵی خۆمان رێكخەینەوە، لەدەنگدانی چونە ناو حكومەتیش من و (4) هاوڕێی دیكەی جڤات دژی چونە ناو حكومەت دەنگماندا”.

باس لەوەشدەكات، “هەردەم ڕەخنەو تێبینیم لەسەر ئەدا و هەڵوێست و بەڕێوەبەردنی بزووتنەوەی گۆڕان هەبووە، مەبەستمان تاكو زیاتر بزووتنەوەكە دورنەكەوێتەوە لەخەڵك و لەو پرەنسیپ و ئامانجانەی كە لە پێناویدا دامەزراوە، بەڵام بەداخەوە ئیستیجابەیان نەبوو، هەموو هەول و صەبر و تەحەمولمان بێ‌ هودە و بێ‌ سوود بوو”.

سەرۆكی فراكسیۆنی گۆڕان دەشڵێت، “خەڵك و ئێمەیان بێ ئومێدكرد، بەردەوامی بەڕێوەبەرانی بزووتنەوەی گۆڕان بەو جۆرە ئەجێندا و نەهج و كاركردنەیان، بەدڵنیاییەوە ئەمجارەش لە هەلبژاردنی داهاتوودا گۆڕانی توشی شكستی قورستر دەكەنەوە ، بۆیە تاكو زیاتر نەبم بە بەشێك لەو شكست و بیهەڵوێستی و لاوازی ئەدا و بەرێوەبردنی بزووتنەوەكە، بەر لە سێ‌ مانگ لە رێكەوتی 6-12-2020 لە نامەیەكی دوو لاپەڕەییدا بڕیاری خۆمدا، وەك ناڕەزایه‌تیەك دەست لەكاركێشانەوەی خۆم لە سەرۆكی فراكسیۆنی گۆران لە ئەنجومەنی پارێزگای هەولێر و ئەندامی جڤاتی نیشتیمانی بزووتنەوەی گۆڕان پێشكەش بە رێكخەری گشتی و ئەندامانی خانەی راپەراندن و جڤاتی نیشتیمانی كردوە”.

عەبدولڕەحمان موهەندیس ئاماژە بەوەشدەكات، “حیزبێك نەتوانێت ڕیفۆرم و چاكسازی لەناوخۆی خۆیدا بكات، حەتمەن ناتوانێت ڕیفۆرم و چاكسازی لەدەرەوەی خۆیدا بكات، ئەوانەی ( گۆڕانی ئێستا ) بەڕێوە دەبەن، ئەگەر پابەندی پرەنسیپ و ئامانجەكانی جارانی گۆڕانن، پێویستە بەخۆیاندا بچنەوە و چیتر بزووتنەوە جەماوەریەكە گچكە و ناشیرین نەكەن”.

پەخشی راستەوخۆی رادیۆ پۆلەتیک