لەهەڵەبجە نەخۆشخانەی وەفا تایبەت بە كۆرۆنا دووبارە دەكرێتەوە

ئەم بابەتە 111 جار بینراوە

پۆلەتیك پرێس- عەلی حەمە سەعید

دوای ئەوەی بەهۆی نەمانی توشبووانی ڤایرۆسی كۆرۆنا لە پارێزگای هەڵەبجە نەخۆشخانەی( وەفا)ی تایبەت بە چارەسەری توشبووانی كۆرۆنا نزیكەی دوو مانگە داخراوە، بەهۆی دوو بارە سەر هەڵدانەوەی ڤایرۆسەكە و توشبوونی چەند هاووڵاتییەك بڕیاری دووبارە كردنەوەی نەخۆشخانەكە درا.

سنور حامید، جێگری بەڕێوەبەری گشتی تەندروستی هەڵەبجە بە پۆلەتیك پرێسی ڕاگەیاند: بەداخەوە بەهۆی دووبارە بڵاوبوونەوەی ڤایرۆسی كۆرۆنا و توشبوونی چەند هاووڵاتییەك بەو ڤایرۆسە، لە شەوی ڕابردووەوە بڕیارماندا نەخۆشخانەی وەفا تایبەت بە چارەسەری توشبووانی كۆرۆنا بكەینەوە و لەئێستادا دوو نەخۆش لەو نەخۆشخانەیە خەوێندراون.

ئاماژەی بەوەشكرد، تا ئێستا هیچ حاڵەتێكی نوێی كۆرۆنای گۆڕاو لە سنوری پارێزگای هەڵەبجە تۆمار نەكراوە، هەرچەندە تا ئێستا كیتی تایبەت بە پشنینی كۆرۆنای گۆڕاو نەگەیشتووەتە دەستمان و چاوەڕێدەكەین لە هەفتەی داهاتوو كیتی تایبەتمان بەدەست بگات و لە پارێزگای هەڵەبجە پشكنینی تایبەت بە جۆری نوێی كۆرۆنای گۆراو ئەنجام بدەین.

رۆژی 10ی كانوونی دووەمی 2021 دوا نەخۆش قاوشی نەخۆشخانەی وەفای تایبەت بە تووشبووانی كۆرۆنای جێهێشت و گەڕایەوە ماڵەوە، لەو كاتەوە تا شەوی رابردوو هیچ حاڵەتێكی تووشبوون بە كۆرۆنا داغڵی نەخۆشخانە نەكرابوو.

لە دوای بڵاوبوونەوەی ڤایرۆسی كۆرۆنا لە پارێزگای هەڵەبجە تا رۆژی 13ی 12ی 2020 لە كۆی حەوت هەزار و 125 پشكنین سێ هەزار و 91 كەس تووشی كۆرۆنابوون و دوو هەزار و 890 كەسیش چاكبوونەتەوە و 153 حاڵەتی گیانلەدەستدان بەهۆی ڤایرۆسی كۆرۆناوە تۆماركراوە.

پەخشی راستەوخۆی رادیۆ پۆلەتیک