30 ساڵە داینەمۆی راپەڕین و بەعس شكێن حەماڵە

ئەم بابەتە 3299 جار بینراوە

ستۆری – محەمەد مستەفا

هاوڵاتیەكی دانیشتوی شاری چوارقوڕنە 30 ساڵ لەمەوبەر كە پیشەی حەماڵی بووە، وێنەی سەدامی سوتاندووە، بەڵام دوای ئەو ماوە زۆرە لەبری پاداشتكردنی كەچی ئێستاش خەریكی هەمان پێشە كۆنەكەیەتی كە ئەویش كاری پڕ لە زەحمەتی حەماڵییە.

محەمەد قادر هاوڵاتییەكی تەمەن 50 ساڵە و دانیشتوی ناحیيەی چوارقوڕنەیە، رۆژی 4 ی ئازاری ساڵی 1991 واتا رۆژێك پێش راپەڕینی هاوڵاتیانی رانییە حەماڵ بووە و تەمەنی تەنها 21 ساڵ بووە، ئەوكاتە لەناو بازاڕی ناحیەكە ئاگر لە چەند بەرمیلێك زبڵ و خاشاك بەردەدات و رێگری دەكات لە هاتوچۆی چەند ئۆتۆمبێلێكی مەفرەزەیەكی هێزەكانی بەعس كە دەیانەویست لەناو بازاڕی چوارقوڕنە بڵاوببنەوە.

30 ساڵ لەمەوبەر كە پیشەی حەماڵی بووە، وێنەی سەدامی سوتاندووە، بەڵام دوای ئەو ماوە زۆرە لەبری پاداشتكردنی كەچی ئێستاش خەریكی حەماڵییە

هەر ئەوكات ناو ناوبانگی محەمەد تەواوی چوارقوڕنەی گرتەوە بەجۆرێك سەرەڕای ئەوەی شاهیدی كارەكانی بوون، هاوكات نازناوەكانی ئەندازیاری راپەڕین و داینەمۆی راپەڕین و بەعس شكێن ناوی دەبەن.

بەیانی رۆژی پێنجی ئازار، هاوڵاتیانی رانیە راپەڕینیان دژی رژێمی بەعس دەستپێكرد محەمەد بە خێرایی دەگەڕێتەوە چوارقوڕنە و بەشداری دەستبەسەرداگرتنی سەربازگەی فیرقەی چوارقوڕنە دەكات

وەك خۆی بۆ پۆڵەتیك باسی دەكرد، دواتر محەمەد دەچێتە دەروازەی چوارقوڕنە و بە هاوكاری چەند گەنجێكی تر وێنەی سەدام حوسێن دەسوتێنێت، ئەو رووداوەش هێندەی دیكە هێزەكانی حزبی بەعس كە لە سنوری رانیيە بوون توڕەو نیگەران دەكات بۆیە هەوڵی دەستگیركردنی دەدەن.

مەفرەزەكەی بەعس نەیانتوانی محەمەد قادر دەستگیربكەن، چونكە ئەو پێشتر بەرەو گوندێكی سنوری ناحیەی چوارقوڕنە هەڵهاتووە و خۆی حەشارداوە.

دواتر و دوای ئەوەی بەیانی رۆژی پێنجی ئازار هاوڵاتیانی رانیە راپەڕینیان دژی رژێمی بەعس دەستپێكرد محەمەد بە خێرایی دەگەڕێتەوە چوارقوڕنە و بەشداری دەستبەسەرداگرتنی سەربازگەی فیرقەی چوارقوڕنە دەكات، هاوكات بەشداری سەرجەم هەڵمەتەكانی راپەڕین لە سنوری قەزای رانیيە دەكات.

بەڵام ئەوەی مایەی نیگەرانی محەمەد قادرە ئەوەیە، سەرەڕای ئەو سەركێش و كارە گەورانەی كە 30 ساڵ پێش ئێستا دژی بەعسی ئەنجامیداوە، بەڵام لەو ماوە زۆرەدا دەسەڵاتی كوردی هیچ پاداشتێكیان نەداوەتەوەو ئەوكات كە پیشەی حەماڵی كردووە ئێستاش بەهەمان پیشەوە سەرقاڵە.

پەخشی راستەوخۆی رادیۆ پۆلەتیک