ئاشتیمان دەوێت

ئەم بابەتە 35 جار بینراوە

سەڵاحەدین دەمیرتاش، هاوسەرۆكی پێشووتری پارتی دیموكراتی گەلان “هەدەپە”، وتارێكی بۆ میدیاسكۆب نووسیوەو تێیدا جەختی لەوە كردووەتەوە، هیچ بژاردەیەك لەبەردەم خەڵكی توركیادا نییە جگە لەژیانی هاوبەش و ئاشتی.

دەمیرتاش لەو وتارەیدا ئەوەشی نووسیوە: ئەو كارەساتەی لەماوەی هەفتەكانی رابردوو لەچیای گارە روویدا مەودای گرنگی و زیندوویی ئاشتی بەبیرهێناینەوەو دەڵێت: سیاسەتی دەسەڵات گەیشتووەتە سنوورێكی ناعەقڵانی و بەداخەوە هیچ كارێكی شێتانە نەماوە نەیكات لەپێناو بەدەستهێنانی دەنگ و كورسی، لەگەڵ ئەوەشدا، نابێت دامەزراوەی سیاسی‌و دەوڵەت بەتەواوەتی رادەستی ئەم جۆرە بیركردنەوەیە ببێت، لەناو ئەو هەموو وێرانكارییەشدا پێویستە نیازی جددی‌و راستگۆیانە بخەینەڕوو تا هیواكانی ئاشتی بە زیندوویی بمێننەوە.

دەمیرتاش باسی لەوەش كردووە، هێشتا لەگەڵ توركەكان‌و كوردەكان دەمرین و ئازار دەچێژین، لەجیاتی ئەوەی چاوببڕینە چەك و توندوتیژی وەك چارەسەر، پێویستە سەرنج بخەینە سەر سیاسەتی دیموكراسی، نابێت واز لە سیاسەتی دیموكراسی بێنین، پێویستە سیاسییە بەرپرسەكان بەبێ بەفیڕۆدانی كات ژێرخانی ئابووری بۆ چارەسەری كۆتایی و هەمیشەیی بنیادبنێن.
هەروەها نووسیویەتی: دەسەڵات هەوڵ نادات بۆ بەدیهێنانی ئاشتی و ئاشكرایە ئاشتی بۆ ئەم حكومەتە گونجاو نییە، لەگەڵ ئەوەشدا، هەڵبژاردنی بێدەنگی لە ئاست ئەو مردنەی گشتگیر دەكرێت تەنیا لەبەر ئەوەی دۆخەكە بەم جۆرەیە، وامان لێدەكات مرۆڤبوونمان لەبیربكەین، سەبارەت بە منداڵەكانمان و دایك و باوكە ئەشكەنجەدراوەكانمان، ئۆپۆزسیۆن بەرپرسیارییەكی گەورە دەگرێتە ئەستۆ تا رێگەنەدات ئیرادەی پێكەوەژیان لەمە زیاتر زیانی پێبگات و هەوڵ دەدات هەلێك بڕەخسێنێت بۆ گەیشتن بە چارەسەری دیموكراسی و ئاشتییانە.

ئاماژەی بەوەشكردووە، چەندین داتای ورد لەلایەن پارتە ئۆپۆزسیۆنەكان بۆ چارەسەر پێشكەش كراوە، بەڵام بەداخەوە، هیچ هەنگاوێكی كۆنكرێتی شانبەشانی ئەو داتایانە نەنراوە.

دەمیرتاش پرسیاری ئەوەی كردووە، ئازار و مردنەكان بەردەوام دەبن؟ ئەی هەمووان هەنگاوی كۆنكرێتی دەنێن بۆ لەئەستۆگرتنی بەرپرسیاری ئاشتی؟

جەختی لەوەش كردووەتەوە، كاتی ئەوەیە ئازایانەتر بۆ بەدیهێنانی ئاشتی هەنگاوبنێین، نابێت بهێڵین كات تێپەڕێت و هێشتا سیاسەتێكی كۆنكرێتیمان دانەنابێت، كە پێویستە سەرجەم ئەو بازنانەی پاڵپشتی ئاشتی دەكەن بەبێ درەنگكەوتن كۆببنەوە لەپێناو بەرهەمهێنانی پڕۆژەی چارەسەری سیاسی.

“جگە لە ئاشتی و پێكەوەژیان هیچ بژاردەیەكی دیكەمان نییە” ئەمە بەشێكی تری نووسیونەكەی دەمیرتاشەو ئەوەش دەڵێت: پێویستە لەسەر هەموو هێزە دیموكراسییەكان بەتایبەتیش هەدەپە، دەستپێشخەری زیاتر بكەن لەپێناو ئاشتی ناوخۆی وڵات و پێشكەشكردنی نەخشەرێگایەكی كۆكرێتی تا لەڕێگەیەوە كۆمەڵگا لەو پشێوی و بێهیواییە دەربهێنن.

لە بەشێكی دیكەی وتارەكەیدا دەمیرتاش ئاماژەی بەوەكردووە، پێویستە كێشەكانمان لەڕێی سیاسەت و گفتوگۆوە چارەسەر بكەین و ئەم جەنگ و ناكۆكییانە كۆتاییان پێبێت، وتیشی: پێویستە بەدەستی خۆمان ئەم ئامانجە بەدیبهێنین بەبێ هیچ فشارێكی دەرەكی، رێگریكردن لە دەستوەردانی دەرەكی لەڕێی بنیادنانی یەكێتییەكی ستراتیژی نوێ بەدیدێت لەگەڵ كوردانی ناوەوە و دەرەوە، نابێت لەسەر بنەمای چارەسەرە شكستخواردووەكان، چارەسەری سیاسی نوێ بدۆزینەوە.

لە كۆتایی وتارەكەیدا دەمیرتاش ئەوەی خستەڕوو، لەجیاتی بینینی چەك‌و توندوتیژی وەك چارەسەر، پێویستە سیاسەتی دیموكراسییەت پەرەپێبدەین، وتیشی: من درك بەوە دەكەن قسەكردن لەسەر ئاشتی لە ناوجەرگەی قەیرانی ئابووری و كێشە تەندروستییەكان ئاسان نییە، بەڵام ناتوانین چارەسەری ریشەیی بۆ هیچ كام لە كێشەكانمان بدۆزینەوە ئەگەر قسە لەسەر دۆسیە ئازاربەخشەكانمان نەكەین، بۆیە ئێستا كاتی زیادبوونی هیوایە بە ئاشتی، ئێمە ئاشتیمان دەوێت و ئامادەین بۆی.

 

پەخشی راستەوخۆی رادیۆ پۆلەتیک