پۆڵەتیك پرێس
پارێزەری دۆسیەی هێرشكردنە غالب محەمەد، ئەندامی پەرلەمانی عێراق دەڵێت، هێرشكردنە سەر غالب محەمەد كارێكی “پلان بۆ داڕێژراوی گروپێك بووە و ئەركی ئیدارەی سلێمانی و دەزگا ئەمنییەكانە تاوانبار بدۆزنەوە”.
وریا محەمەد، پارێزەری دۆسیەی هێرشكردنە سەر غالب محەمەد، ئەندامی هاوپهیمانی هیوا له پەرلەمانی عێراق بە پۆڵەتیك پرێس-ی راگەیاند:”دادگای لێكۆڵینەوەی سلێمانی بڕیاری دەستگیركردنی تۆمەتبارێكی دەركردووە، سەرەتای لێكۆڵینەوەیە و كۆتایی نەهاتووە، ئێمەش چاوەڕێدەكەین لێكۆڵینەوەكان بە ئاراستەیەكی باشدا بڕۆن”.
ئەو پارێزەرە وتیشی: “غالب محەمەد كێشەی كەسی و كۆمەڵایەتی لەگەڵ هیچ كەس نیە، كەس تۆمەتبار ناكەین و پێمان وایە ئەركی هێزە ئەمنییەكان و ئیدارەی سلێمانیە تاوانبارانی دۆسیەكە بدۆزێتەوە، چونكە ئێمە پێمان وایە ئەو كارە پلان بۆ داڕێژراوبووە لە ئاستی گروپدا ئەو كارە كراوە نازانین كێیە، بەڵام دڵنیاین كێشەكە سیاسییە”.
ئێوارەی 26 ی شوباتی 2021 لەلایەن كەسێكەوە لە بەردەم ماڵەكەی خۆی هێرشكرایە سەر غالب محەمەد، تا ئێستا ئەنجامدەری هێرشەكە دەستگیرنەكراوە، بەشێك لە دەزگاكانی راگەیاندنیش وێنەی كەسێكیان بڵاوكردووەتەوە گوایە ئەنجامدەری هێرشەكەبووە.