کاریگەرییەکانی ڤاکسینی کۆرۆنا لەسەر خانمانی دووگیان

پۆڵەتیک پرێس

پسپۆڕەکان چەندین لێکۆڵینەوەیان سەبارەت بەم بابەتە کردووە، تازەترین لێکۆڵینەوەکان دەریدەخەن ڤاکسینی کۆرۆنا زیانی بۆ خانمانی دووگیان نییە.

پزیشکانی پسپۆڕ لە بواری نەخۆشییەکانی خانمان و لەدایکبوون لە زانکۆی ئەمریکی چەند لێکۆڵینەوەیەکیان کردووە، لەئەنجامدا دەرکەوتوە ڤاکسینی کۆرۆنا لە کاتی دووگیانی، دوای منداڵبون و کاتی شیرپێدان هیچ زیانێکی نییە.

ڤاکسینەکە نابێتە هۆی کەمئەندامی یان هەر کێشەیەکی دیکەی تەندروستی، کاریگەرییە لاوەکییەکانی بۆ کەسێکی ئاسایی چەندە بۆ خانمانی دووگیانیش ئەوەندەیە.

لە سەرەتای بەکارهێنانی ڤاکسینەکە، کەسانی ئاسایی و خانمانی دووگیانیش لەوانەیە توشی هەوکردنی قۆڵ ببن یان هەست بە هیلاکی بکەن، بەڵام کاتییە و نامێنێت.

لەگەڵ ئەوەشدا، پێویستە خانمانی دووگیان پێش وەرگرتنی ڤاکسینەکە و دوای وەرگرتنیشی سەردانی پزیشکی تایبەت بەخۆیان بکەن بۆ وەرگرتنی ڕێنماییە تەندروستییەکان.