پۆڵەتیك پرێس
سكرتێری یەكێتی مامۆستایان رایگەیاند، رەوشی خوێندن لەناو ناوەندەكانی خوێندندا بەشێوەیەكی باش دەڕوات ئەو خوێندكارانەی تووشی ڤایرۆسی كۆرۆنا بوون نابنە هۆی راگرتنی پرۆسەی خوێندن و حاڵەتەكان ئاساین.
ئەحمەد گەرمیانی سەرۆكی یەكێتی مامۆستایانی كوردستان بەپۆڵەتیك پرێس-ی راگەیاند، بەگوێرەی ئەو هەڵسەنگاندنانەی بۆ رەوشی خوێندن و دەستپێكردنەوەی خوێندن كردوویانە پرۆسەكە بەجێبەجێكردنی خۆپارێزی ورێنماییە تەندروستییەكان بەشێوەیەكی باش دەڕوات و ئەو ژمارە حاڵەتەی تووشبوون بەڤایرۆسی كۆرۆنا لە هەندێك لەپارێزگاو قەزاكان تۆماركراون لەناو خوێندكاراندا جێگای مەترسی نینو نابێتە هۆی ئەوەی پرۆسەی خوێندن پەكبخرێت.
وتیشی: ئەگەر ئامارەكانی تووشبوون بەڤایرۆسی كۆرۆنا لە ناو ناوەندەكانی خوێندن بەم شێوەیەی ئێستا بێت سەركەوتوو دەبن لەتەواوكردنی خوێندنی ساڵی 2021.
ئاماژەی بەوەشكرد، لیژنەی باڵای رووبەڕووبوونەوەی كۆرۆنا 23 ی ئەم مانگە بڕیار دەدەات لەسەر بەردەوامیدان بەخوێندن یان وەستاندنی.
رۆژی 7ی شوباتی 2021 دەوامی قوتابخانە و خوێندنگەكان لە هەرێم دەستیپێكردووە، ئەوەش دوای ئەوەی بەهۆی بڵاوبوونەوەی ڤایرۆسی كۆرۆناوە پرۆسەی خوێندن لەناو قوتابخانەكانی هەرێم بۆ ماوەی ساڵێك ڕاگیرا، دوای دەستپێكردنەوەی پرۆسەكەش چەند حاڵەتكی تووشبوون بەكۆرۆنا لەناو خوێندنگەكان تۆماركراون و مەترسی بەرزبوونەوەی حاڵەتەكانیش لە ئارادایە.