رووی سەربازی ئۆپاراسیۆنی (گارە)

لەم كاتەی پێشبینی دەكرا، سوپای توركیا جوڵەیەكی سەربازی بەرەو شەنگال ئەنجامبدات، بە شێوەیەكی ناچاوەڕوانكراو ئەم سوپایە ئۆپاراسیۆنێكی بۆ سەر شاخی (گارە) كە دڵی ناوچەی بادینانە دەستپێكرد. ئەم بادانەوەی توركیا لە شەنگال بۆ گارە، لە كوورترین و پوختەترین لێكدانەوەیدا، ئاماژەیە بە نەبوونی زەمینەی، سیاسی، سەربازی و دیپلۆماسی بۆ ئەوەی توركیا بتوانێ لە شەنگال دیفاكتۆی رۆژئاوای كوردستان دووبارە بكاتەوە.

بۆ تێگەیشتن لە مەودای بەرفراوانی و بەرتەسكی ئۆپاراسیۆنەكە (ئۆپاراسیۆنی گارە) و بزانین تورك دەخوازن لە شاخی گارە وەكو ناوچەی خواكوڕك و هەفتانین بمێنەوە، یان ئۆپاراسیۆنەكە سنووردارە و ئامانجی تایبەتی هەیە، دەبێت لە رووی جوگرافی ئۆپراسیۆنەكە بخوێنینەوە.

گەریلاكانی پەكەكە لە دوای (ساڵی 1994) لە گارە گیرساونەتەوە. لەم بەروارە بە دواوە ئەم ناوچەیە بۆتە وێستگەیەكی گرنگی، لۆجستیكی، پەروەردەیی و تەندروستی پەكەكە. لەگەڵ ئەوەشدا سوپای توركیا بۆ جارێكیش ئۆپاراسیۆنی زەمینی بۆ سەر ئەم ناوچەیە ئەنجامنەداوە. هۆكارەكەشی بۆ شوێنی گارە دەگەڕێتەوە كە بە قوڵایی نزیكەی 45 كم لە سنووری باكووری كوردستان دوورە و لە شاخەكانی دیكە دابڕاوە.

سوپای تورك لە بەرزایی (حەوت تەبەق) لە ئاسمانەوە بە هەلیكۆپتەر هێزی دابەزاندووە. ئەم بەرزایە ستراتیژیترین شوێنی گارەیە. لەلایەك رۆژهەڵات و رۆژئاوای گارە لێك جیادەكاتەوە، لەلایەكەی دیكە، پەیوەندی گارە لەگەڵ چیای پێرس و ناوچەی زێبار، زاپ و ناوچەكانی دیكە دروست دەكات. داگیركردنی ئەم بەرزایە بە واتای بەرتەسكردنەوەی گۆڕەپانی موناوەڕەی پەكەكە دێت كەگرنگترین رەگەزی شەڕی گەریلاییە. بۆیە دابەزاندنی هێز لە حەوت تەبەق ئاماژەیە بە هەوڵی مانەوەی توركیا بۆ مەودا درێژ. بەڵام ئەم ئاماژەیە بەتەنیا بەس نیە بۆ ئەوەی بیسەلمێنێن توركیا دەمێنێتەوە. بەڵكو كۆمەڵە رەگەزێكی دیكەش لە ئارادایە كە بەستنەوەیان بە یەكتر ئەنجامێكی دیارترمان پێ دەبەخشێت.

بەپێی ئەم مەعلوماتە سنووردارەی لە میدیا بڵاوكراوتەوە، چەقی بۆمبارانی ئاسمانی و جوڵەی زەمینی سوپای توركیا گوندی سیانێ بووە، كە دەكەوێتە ناوەڕاستی شاخی گارە بە دیوی باشووریەوە. گوایە سەرباز، پۆلیس و ئەندامانی میت كە بەدیل لە دەستی پەكەكە دایە لە سیانێ زیندانی كراون. كە بۆ من لۆژیكی نایێت. بەڵام ئەم مەعلوماتە ئاماژەیە بە سنوورداری و كاتیبوونی ئۆپاراسیۆنەكە.

ئاماژەیەكی دیكەی سنوورداری ئۆپاراسیۆنەكە، هێڕشی زەمینی توركیایە تەنیا لە قۆڵێك، چونكە بۆ ئۆپاراسیۆنێكی بەرفراوان و تەنگاوكردنی پەكەكە لە گارە پێویستە لە چەمانكێ كە دەكاتە رۆژئاوای گارە دەست بە جوڵەی زەمینی بكرێت. بەبێ گورز وەشاندن لە سەنگەرەكانی پەكەكە لەم بەرەیە ناتوانرێت مەودای موناوەڕەی پەكەكە بەرتەسك بكرێتەوە كە شەڕی گەریلایی پەیڕەو دەكات.

ئۆپاراسیۆن بێ ئەنجام بوو؟
بێ ئەوەی بتوانین وڵامی پرسیاری سەرەوە یەكلایی بكەینەوە، كە ئایا توركیا دەیویست گارە بكاتە خواكوڕك و هەفتانینی دووەم، ئۆپاراسیۆنەكە تووشی شكست بوو، دەرفەتی مانەوەی توركیا بەرتەسك بۆتەوە ئەگەر نەڵێین بە تەواوی نەماوە و ناچار بە كشانەوە كراوە.

بە گوێرەی راگەیاندنی فەرمی توركیا، لە رۆژی یەكەمیندا رائید بوڕاك جۆشكن و پلەدارێكی دیكە بەناوی هاڕون توڕهان كوژراون. لە رۆژی دووەمینیشدا رائید ئەرتوغ گولەر دوای برینداربوونی گیانی لەدەستدا.

ئەمەش ئاماژەیە بە شكستی ئۆپاراسیۆنەكە، چونكە زۆرجار ئۆپاراسیۆنەكانی سوپای توركیا بەهۆی كوژرانی پلەدارێك شكستی هێناوە و تووشی پاشەكشە بووە.

بۆ ئەنجامگرتن لە ئۆپاراسیۆنی شاخێكی وەكو گارە، مەعلوماتی هەواڵگری گرنگی تایبەتی خۆی هەیە، ئەگەر نەڵێین چارەنووسسازە، پێدەچێت توركیا لەم رووەوە ئەمجارە مەعلوماتی تەواوی نەبێت، یان مەعلوماتی هەڵەی پێدرابێ. سۆسیال میدیا باس لەوە دەكات، كە ئامانجی ئۆپاراسیۆنەكە بە ئامانجگرتنی سەركردەیەكی پەكەكە بووە، كە گوایە ماوەیەكە لە گارە و بەتایبەتی لە دەوروبەری سیانێ گیرساوەتەوە. ئەوەی راستی ئەمەش نیشان دەدات، لێدوانەكەی رەجەب تەیب ئەردۆغان بوو لە رۆژی 8 شوبات واتە دوو رۆژ بەر لە ئوپاراسیۆنی ناوبراو كە دەڵێت:” رۆژی چوارشەممە قسە بۆ میللەت دەكەم، داواتان لێدەكەم گوێم لێبگرن. چەند شتێكی خۆشتان پێشكەش دەكەم”.

بێدەنگبوونی ئەردۆغان لە رۆژی چوارشەممەی رابردوودا ئاماژەیەكی دیكە لەسەر بێ ئەنجامی ئۆپاراسیۆنی گارە.

هێمن خۆشناو