نۆرەی بارزانییە

ئەم بابەتە 47 جار بینراوە

مام جەلال لەدوای نسكۆ، بەبێ پرسكردن بەهێزە هەژموونگەراكانی سەرمایەداری، “شۆڕشی حوزەیران” كە دواتر ناوەكەی بۆ “شۆڕشی نوێ” گۆڕا، بەرپاكرد!. دوای سێ ساڵ كاركردنی چڕوپڕ، دەزگا سیخوڕییە هەرێمی و نێودەوڵەتییەكان لەهەكاری، هەرچی هێزی یەكێتی هەبوو، تەفرووتونایان كرد، بەڵام مام جارێكی دیكە دەستیپێكردەوە و كۆڵی نەدا.

دوای ڕاپەڕین، بەپێی هەموو پێوەرەك، وەك زیرەكی و دیبلۆماسییەت، وەك ماندووبوون و قوربانیدان، دەبووا مام و یەكێتی كەس و هێزی نمرە یەك بن لەباشووری كوردستاندا، بەڵام هێزە هەرێمی و هەژموونگەراكانی سیستەم، جوو و تووركیا و ئێران و ئەوروپا و ئەمەریكا، هەمووان لەپشتی پارتی و بوغزاندنی یەكێتی بوون!

ئەو ئێرانەی كە ئێستا بەدۆستی یەكێتی دەزانرێ، جگە لەوەی مەرزی حاجی ئۆمەرانی تەسلیم پارتی كرد، لەخەیاڵی ئەوەدابوو جگە لەهەڵەبجە، ناوچە سنوورییەكانی پێنجوین و پشدەریش، پارتی تێدا باڵادەست بێت!

لەدوای چەند خولێك لەشەڕی ناوەخۆ، مام لەیارییەكە گەیشت، چارەسەری مامناوەندی هەڵبژارد، كۆبوونەوەكی بەسەركردایەتی یەكێتی كرد و گوتی، تەواو! ئەو هەموو تەنازووڵەی بۆ ئێرانی دەكەم، بۆ كاك مەسعودی دەكەم!

ڕێككەوتنی یەكێتی و پارتی لەو ڕۆژە دەستیپێكرد، سەرەڕای هەموو تێبینییەكان، بەڵام ئاوارەكان گەڕانەوە شارەكان، چەند ساڵێك دۆخێكی ئابووری و سیاسی و كۆمەڵایەتی ئارام و باش هەرێمی گرتەوە و مام بۆخۆشی بووە سەرۆك كۆمار و مەرجەعی هەموو عێراق بەكورد و شیعە و سوننەوە!

ئەو هەنگاوەی مام گرتییەبەر، ئێستا نۆرەی كاك مەسعودە! ئەو تەنازووڵاتەی ئەو بۆ توركیا و ئێرانی دەكا، با بۆ لاهوور و هاوپەیمانی هیوا و پەكەكە بیكات!

لەئێستادا كاك مەسعود پێویست دەكا لەگەڵ لاهوور و هاوپەیمانی هیوا دابنیشێ، لەسەر ئاستی ناوەخۆ، پارەی ئاو و كارەبا و مۆبایل و ئینتەرنێت هەرزانتر بكرێ، مووچە بكرێتەوە مانگانە و هەرچی زووە گیراوەكانی بادینان ئازاد بكرێن و ئابلۆقەی سەر كەمپی مەخموور هەڵبگیرێ!

ئەگەر كاك مەسعود ئەم هەنگاوانە بگرێتەبەر، بێشك ئەوكاتە دەبێتە مەرجەعی هەمووان و لەپایتەختەكاتی ئەنقەرە و تەهران و بەغدا، لەسەر ئاستی نێودەوڵەتی، وەك كەسی نمرە یەك، حسابی بۆ دەكرێت.

محمەد گۆران

پەخشی راستەوخۆی رادیۆ پۆلەتیک