بەرزبوونەوەی بەهای دۆلار خەڵكی عێراقی شەكەت كردووە

ئەم بابەتە 134 جار بینراوە

پۆڵەتیك پرێس:
پسپۆڕان هۆشداری دەدەن، لەمەترسی ناجێگیربوونی دۆخی ئابووری‌و جەختیش دەكەنەوە، رەنگە بەو هۆیەوە خۆپیشاندان‌و ناڕەزاییە جەماوەرییەكان لەعێراق سەرهەڵبدەنەوە.

بەپێی راپۆرتێكی كەناڵی حوڕە، هۆشداری پسپۆڕان، پەیوەندی بە بەرزبوونەوەی نرخی دۆلارەوە هەیە، كە ئەوە ژیانی خەڵكی عێراقی بەگشتی قورس كردووەو بەو هۆیەشەوە ژمارەیەكی زۆر خەڵكی بێ‌ كاربوون.

لەدوو ساڵی رابردوو، بەهۆی خراپی دۆخی ئابووری‌و نەبوونی خزمەتگوزارییەكان، چەندین خۆپیشاندانی جەماوەری لەعێراق سەریانهەڵداوە، كە گەورەترین ناڕەزاییەكانیش لەشاری بەغدای پایتەختی عێراق بووە، هەر بەو هۆیەشەوە حكومەتی عادل عەبدولمەهدی سەرۆك وەزیرانی پێشوو دەستی لەكاركێشاوەتەوە.

ئەگەر خۆپیشاندان سەرهەڵبداتەوە، رەنگە سیناریۆی گۆڕینی حكومەت دووبارە بێتەوە

پسپۆران هۆشداری ئەوەشیانداوە، ئەگەر خۆپیشاندان سەرهەڵبداتەوە، رەنگە سیناریۆی گۆڕینی حكومەت دووبارە بێتەوەو مستەفا كازمی سەرۆك وەزیرانی عێراق جارێكی تر دەست لەكاربكێشێتەوە.

هاوكات چالاكوانان دەڵێن، گەورەبوونی هەژاری یەكێكە لەو فاكتەرانەی، كە وا دەكات خۆپیشاندانەكان بەردەوام بن‌و لەو بارەوە زیاد ئەسەد، كە بەشداری چەندین خۆپیشاندانی دژ بە حكومەتی كردووە، جەخت لەسەر ئەوە دەكاتەوە، باری ئابووری هەموو خەڵكی ناسرییە و عێراق ڕۆژ بە ڕۆژ خراپتر دەبێت، وتیشی: ئێمە خۆپیشاندانی زیاتر ئەنجامدەدەین‌و لەشەقام‌و گۆڕەپان‌و ناڕەزاییەكان فراوانتر دەكەین.

هاوكات سەجاد جەیاد، شیكەرەوەی سیاسی، دەڵێت: ئەگەر ئەم دۆخەی ئێستا بەردەوام بێت و نرخی نەوت بەنزمی بمێنێتەوە، ئەگەری ئەوە هەیە زیاتر خەڵك مانگرتن یان ناڕەزایی دەربڕن‌و دۆخەكە سەختر بێت.

ئەگەری ئەوە هەیە زیاتر خەڵك مانگرتن یان ناڕەزایی دەربڕن‌و دۆخەكە سەختر بێت

زۆرێك لەدوكاندارانی بەغدا سكاڵایان لەسەر خراپی دۆخی بازاڕو نەبوونی كڕیار هەیە، ئەوەش پەیوەندی بە نزمبوونەوەی بەهای دینار بەرانبەر دۆلاری ئەمریكییەوە هەیە.سعد سەلمان، خاوەنی دوكانێكی شیرینییە لەشاری بەغدا لەو بارەوە دەڵێت: بەرزبوونەوەی نرخی دۆلار ژیانی خەڵكی وێران كردووە، هێزی كڕین بەشێوەیەكی بەرچاو دابەزیووە.

مانگی رابردوو بانكی ناوەندی عێراق بەهای دیناری بەرانبەر دۆلار نزمكردەوە، ئەوەش لەپێناوی پڕكردنەوەی ئەو كورتهێنانەی لەبودجەدا هەیە، بەڵام شارەزایانی ئابووری هۆشداری لەلایەنە نەرییەكانی ئەو بڕیارە دەدەن.

ئابووریناسان دەڵێن، ڕەنگە ساڵی 2021 ڕێژەی هەژاری عێراق لە 20٪ بۆ 30٪ بێت، یان زیاتر بێت لەو ژمارانەی لەساڵی 2020 تۆماركراون.

لەلایەكی تر عەلی سەففەر شارەزا لەئاژانسی وزەی نێودەوڵەتی بارودۆخی ئابووری عێراق وڵاتەی بەزۆر خراپ وەسفكردووەو دەڵێت: سەرەڕای كاریگەری پەتای كۆرۆنا لەسەر ئابووری وڵاتان بەگشتی، بەڵام عێراق زۆرترین ئازار و لاوازی باری نالەباری و ناسەقامگیری ئابووری بەخۆوە بینیوە.

دۆخی ئابووری عێراق دەیان ساڵە ناجێگیرە

سەففەر ئاماژەی بەوەشكرد، كە دۆخی ئابووری عێراق دەیان ساڵە ناجێگیرە، هەروەها ڕوونیشیكردووەتەوە، عێراق پشت بەنەوت دەبەستێت‌و ئەوەش هۆكارێكی ترە بۆ ناجێگیربووتربوونی دۆخی ئابووری ئەو وڵاتەیە.

ئابووریناسان جەخت لەوەش دەكەنەوە، پێویستە عێراق ئابوورییەكی جۆراوجۆرترو كەرتی تایبەتی گەورەتری هەبێت ، بۆ ئەوەی بژێوی خەڵكی زۆر پشت بە نرخی نەوت نەبەستێت.

پەخشی راستەوخۆی رادیۆ پۆلەتیک