ئه‌گه‌ر ڕێككه‌وتن ڕوونه‌دات هه‌رێم ده‌توانێت به‌رده‌وامبێت له‌ فرۆشتنی نه‌وت؟

ئەم بابەتە 165 جار بینراوە

پۆڵەتیك پرێس
ئەندامێكی پەرلەمانی عێراق رایگەیاند، ئەگەر ناوەند و هەرێمی كوردستان نەگەنە رێگەوتن، عێراق ناتوانێت رێگە له‌هەرێم بگرێت نەوت بفرۆشێت و هەردولاش بۆبەردەوامیدان بەسیاسەتی ئێستایان خۆیان لەبەرپرسیارێتی دەدزنەوە.َ

موسەننا ئەمین، ئەندامی پەرلەمانی عێراق به‌ پۆڵەتیك پرێس-ى راگه‌یاند، شاندی هەرێم بۆیە په‌نا بۆعێراق ده‌بات، تا دەقێكی یاسایی دەست بكەوێت بیكات بەچەترێك بۆخۆی تا نەوتی پێ بفرۆشێت، ئەویش لەپێناو بەردەوامیدان بەو سیاسەتەی كە هەیە و لەبەرژەوەندی كاربەدەستە باڵاكانی هەرێم و كۆمپانیاكانیانە.

موسەننا ئەمین وتیشی:”ناكرێت حكومەتی عێراق بودجه‌ نه‌داته‌ هه‌رێم و ڕێگه‌ش نه‌دات هەرێم نەوتەكەی بفرۆشێت، خراپترین سیناریۆش ئەوەیە كە هەردولا خۆیان لەبەرپرسیارێتی دەدزنەوە، ناوەند بەبیانوی رادەستنەكردنی داهات و هەرێمیش بەبیانوی نەبونی داهات، لەكۆتاییەكەیدا خەڵك زەرەرمەندی یەكەمه‌ و بێ موچە دەبێت”.

ئه‌و ئه‌ندامه‌ی په‌رله‌مانی عێراق باسی له‌وه‌شكرد، “چاوەرواندەكرێت لەقۆناغی داهاتودا ناوەند رێگە له‌هەرێم بگرێت خۆی نەوت بفرۆشێت، هەوڵدەدات خۆی بودجە و پێداویستییەكان بۆهەرێم دابین بكات، هه‌روه‌ها بریارێكی یاسایی دەربكات تا رێگە نەدات هەرێم سەربەخۆ نەوت بفرۆشێت و مامەڵە بەخاڵە سنورییەكانه‌وە بكات، بۆیە ئەگەر ناوەند ئەو هەنگاوە بنێت لەبەرژوەندی هەرێم نابێت و هەموو لایەنەكانیش لێی بەرپرس دەبن، هەمووان دەیانەوێت كارەكان نەگات بەوەی ناوەند ئەو هەنگاوە بنێت”.

موسه‌ننا ئه‌مین جه‌ختیكرده‌وه‌ له‌وه‌ی “ترسی كورد ئەوەیە رۆژێك هەرێم بخرێتە بەردەم ئەو بەرپرسیارێتیە و ناچار بكرێت پابەندی هەندێك داواكاری بێت، ئەو سیاسەتەی ئێستای حكومەتی هەرێم دەیكات رەنگە بیگەیەنێت بەو دۆخەی كە چاوەرشێدەكرێت”.

سەبارەت بەرێككەوتنی ناوەند و هەرێمیش موسه‌ننا ئه‌مین وتی، دانیشتنەكانی شاندەكەی هەرێم لەگەڵ لایەنە سیاسییەكانی عێراق دڵخۆشكەرنین و هیچ ئەنجامێكی نەبووە و زۆرینەی فراكسیۆنەكانی ناوپەرلەمانیش هەوڵی ئەوە دەدەن، لەدواساتەكانیشدا بێت كارێك بكەن ناوەندو هەرێم قبوڵیان بێت.

پەخشی راستەوخۆی رادیۆ پۆلەتیک