تەڵەی تورکیا بۆ تێوەگلانی عێراق و هەرێم

پۆڵەتیک پرێس: لاڤە واحید

بەمزووانە تورکیا ئۆپراسیۆنێک دژی پارتی کرێکارانی کوردستان “پەکەکە” لە شنگال ئەنجام دەدات، بەڵام شارەزایان هۆشداری دەدەن کە سەرکەوتنی ئۆپراسیۆنێکی لەم شێوەیەیە بەتوندی پەیوەستە بە هاوکاری عێراق و حکومەتی هەرێمی کوردستانەوە.

راپۆرتێکی رۆژنامەی دەیلی سەباح کە بە پێنوسی نوربانو کیزیل نوسراوە بەم پێشەکییەی سەرەوە دەستپێدەکات و باس لە هەڕەشەکانی تورکیا دەکات لەبارەی دەستپێکردنی هەڵمەتێکی سەربازی لەناو خاکی عێراق، بەڵام نوسەرەکە هەرزوو ئەوە پشتڕاست دەکاتەوە کە کۆتاییهێنان بە چوار دەیە خەبات کارێکی هەروا ئاسان نییە، سەرباری ئەوەی تورکیا هەوڵی داوە لە ناوەوە و تەنانەت لە دەرەوەی خاکی خۆی و لە شنگالی باکوری عێراق کۆتایی بە پەکەکە بهێنێت.

هەڕەشەی پێشتری ئەردۆغان لە سوریا لەگەڵ ئەمەی شنگال جیاوازی هەیە، بەهۆی جیاوازی بەرژەوەندییەکان و هەوڵەکانی حکومەتی عێراق و کوردستان

تورکیا بەتایبەتی لەدوای سەردانەکەی خوڵوسی ئاکار، وەزیری بەرگری ئەو وڵاتە، هەوڵەکانی چڕتر کردووەتەوە بۆ هێرشکردنەسەر پەکەکە و راکێشانی هێزە عێراقییەکان تا ببنە لایەنی راستەوخۆی روبەڕوبوونەوەی تورکیا و پەکەکە، لەوبارەیەوە نوربانو دەڵێت: بەمزووانە تورکیا ئۆپراسیۆنێک دژی پەکەکە لە شنگال ئەنجام دەدات یاخود یارمەتی پێشکەشی سوپای عێراق دەکات بۆ جێبەجێکردنی ئەو ئۆپراسیۆنە.

بەبڕوای شارەزایان، هاوبەشی نێوان عێراق و تورکیا لە جێبەجێکردنی ئەم ئۆپراسیۆنە تەنیا لێدانێکی توند نییە بۆسەر پەکەکە، بەڵکو دەبێتە هۆی بێهیوایی لە دروستکردنی رارەوێک لەلایەن لقەکانی سەر بە پەکەکە و سەقامگیری بۆ ناوچەکە دەگەڕێنێتەوە، لەگەڵ ئەوەشدا، ئەو هاوبەشییە پێویستی بە پابەندبوونی راستگۆیانەی ئیدارەکانی بەغدا و هەرێمی کوردستان هەیە.

حکومەتی داد و گەشەپێدانی تورکیا کە لەلایەن رەجەب تەیب ئەردۆغانەوە سەرۆکایەتی دەکرێت دەزانێت، هەریەکە لە حکومەتی عێراق و هەرێم دوودڵن لە بەشداریکردن لەم ئۆپراسیۆنەی تورکیا لە دژی پەکە.

لەدوای سەردانەکەی خوڵوسی ئاکار، وەزیری بەرگری ئەو وڵاتە، هەوڵەکانی چڕتر کردووەتەوە بۆ هێرشکردنەسەر پەکەکە و راکێشانی هێزە عێراقییەکان تا ببنە لایەنی راستەوخۆی روبەڕوبوونەوەی تورکیا و پەکەکە

نوسەر لەسەر بنەمای لێدوانەکەی ئەردۆغان کە لە 22ی کانوونی دووەمی رابردوو وتی: “لەوانەیە شەوێک لەناکاو بێینە ئەوێ” ئاماژە بەوەدەکات، پێشتریش بە ماوەیەک بەر لە ئۆپراسیۆنەکەی باکوری سوریا، ئەردۆغان هەمان قسەی کردووە، بەبڕوای جان ئەکۆن، شارەزا لەبواری سیاسەتی دەرەوە، رەنگە تورکیا بەهاری داهاتوو دەست بە ئۆپراسیۆنەکەی بکات لە شنگال.

نوسەرەکە ئاماژە بەوە دەکات، هەڕەشەی پێشتری ئەردۆغان لە سوریا لەگەڵ ئەمەی شنگال جیاوازی هەیە، بەهۆی جیاوازی بەرژەوەندییەکان و هەوڵەکانی حکومەتی عێراق و کوردستان بۆ دوورخستنەوەی ئەو روبەڕوبوونەوە سەربازییە و بڕواهێنان بە پەکەکە بۆ چۆڵکردنی شنگال لەکاتێکدا حکومەتی عێراق دەیەوێت بارودۆخی ئەو قەزایە ئاسایی بکاتەوە.

ئەکۆن پێیوایە پەکەکە ناسەقامگیری ناوچەکە بۆ بەهێزکردنی خۆی بەکاردەهێنێت، ئەمەش مەترسی نەک تەنیا بۆ تورکیا بەڵکو بۆ بەرژەوەندییەکانی عێراق و کوردستانیش دروست دەکات، دەشڵێت: کۆتاییهێنان بە پەکەکە رەنگە لە بەرژەوەندی هەرسێ لایەندا بێت بەڵام لەهەمان کاتیشدا لەمڕێیەوە تورکیا هەوڵ دەدات عێراق و کوردستان لە ناکۆکییەکانی دژ بە پەکەکە تێوەبگلێنێت.

ئەکۆن ئاماژە بەوەش دەکات، سوپای عێراقی دەیەوێت کۆتایی بە پەکەکە بهێنێت و تورکیاش ئامادەیە هاوکاری پێشکەش بکات، هاوکات، پێشبینییەکی هاوشێوەش بۆ ناوچەکانی مەخمور و قەندیل هەیە.

ئەکۆن دەڵێت: پەکەکە لە عێراق رووبەڕووی فشاری توند دەبێتەوە و توانا سەربازییەکانی لەوێ سنوردارە.

هەوڵەکانی ئەنقەرە بەردەوامە و لەم دواییانەدا ژمارەیەک گەورە بەرپرسی عێراقی و تورک چەند کۆبوونەوەیەکیان ئەنجامدا لەبارەی دۆسیەی شنگال.

بەپێی راپۆرتەکەی نوربانو، ئاساییە حکومەتی عێراق لەو دڵەڕاوکێیانە تێبگات کە پەکەکە بۆ تورکیای دروست دەکات، بەڵام بەبێ ئەوەی گەرموگوڕی هەبێت بۆ ئەوەی لە ئۆپراسیۆنێکی لەم شێوەیە تێوەبگلێت.

لەلایەکی دیکەوە، جەنگیز تومار، سەرۆکی زانکۆی ئەحمەد یەسیفی باس لەوە دەکات، شنگال ناوچەیەکی ستراتیژییە و بە قەندیلی دووەم لەقەڵەمدەدرێت بۆ پەکەکە، تومار دەڵێت: لێدان و هێرشکردنەسەر شنگال هەمیشە بژاردەیەکی پێشنیارکراوە لەلایەن تورکیاوە.

لە ئێستاشدا، تورکیا هەموو هەوڵێک دەدات بۆ بڕواهێنان بە عێراق و هەرێم لەبارەی ئەنجامدانی ئۆپراسیۆنێکی بەرفراوانی سەربازی، لەکاتێکدا چ عێراق چ هەرێم دەزانن ئەگەر لەم ئۆپراسیۆنەدا بچنەپاڵ تورکیا، ئەوا دەچنە ناو ناکۆکییەوە لەگەڵ پەکەکە، ناکۆکییەک کە کۆتاییەکەی دیار نییە.

قەیوان گروپ

 


مایۆرکا سیتی جوانییەک لە دڵی سروشتدا