لە كێشەی سیاسییەوە بۆ ڕقی كۆمەڵایەتی !

ئەم بابەتە 68 جار بینراوە

ئەو پارەیەی كە دەسەڵاتدارانی هەرێمی كوردستان بۆ بەرژەوەندی حیزب و گروپ و تاقم و شەخس بەكاری دەهێنن، قوتی ئەو خەڵكە هەژارەی هەرێمە، كە مانگەكانی ساڵ بە بژی و مەمرە بەڕێ دەكەن.

داهاتی نەوت و خاڵە سنوریەكانی هەرێم، پشكی ئەو خەڵكە هەژارەیە، كە موچەی مانگانە نادرێتە فەرمانبەرەكانی، بەشی ئەو خەڵكەیە، كە قۆرخكاری حیزب و دەستگرتن بەسەر بازاڕ، لە كاسبیش بێبەشی كردوون.

حوكمڕانی هەرێم كە لەسەر ئاستی ناوخۆ متمانەی لەدەستداوە، لەسەر ئاستی عێراقیش، بەهۆی پەرتەوازەیی و خیتاب جیایی، ڕقێكی گەورەی كۆمەڵایەتی شەقامی عێراقی بەرانبەر خەڵكی كورد دروستكردووە، بە شێوەیەك تاكی عێراقی وا دەزانێت، خەڵكی كوردستان، ئەوانی خستووەتە ئەو میحنەتەوە و بێبەشی كردوون لە خزمەتگوزاری، یاخود وا دەزانێت خەڵكی هەرێم بەشی ئەوانی خواردووە، لەكاتێكدا ئەوان لە كاتی خۆیدا موچەیان دێت، ئەوان بخۆری سەرەكی ١٤٦ تریلیۆن دیناری ساڵانەی عێراقن، بەڵام خەڵكی كورد دوو مانگ جارێ موچەی پێدەدرێ.

كارەساتە دوو مانگ جارێ موچەت بێت و دەسەڵاتی خۆماڵی دایدۆشیبیت، كەچی سودمەندبووانی ناوەڕاست و خوارووی عێراق لە ملیۆنەها دۆلاری ساڵانەی عێراق، كێشمەكێشە سیاسیەكان، ببەنە چوارچێوەی ڕقی كۆمەڵایەتیەوە و خەڵكی بێ موچەی هەرێم، بە بردنی پشكیان تۆمەتبار بكەن.

ڕەنگە بپرسرێ، چۆن دەزانرێ كە كێشمەكێشە سیاسیەكان براوەتە چوارچێوەی ڕقی كۆمەڵایەتیەوە؟ وەڵامەكە ڕوونە، یەك بەرپرس و حیزبی عێراقی لە ترسی شەقام ناوێرێت، بە حەرفێك تەنانەت بەرگری لە پارەی ئەو گەنمەش بكات، كە جوتیاری زەحمەتكێشی كورد، بە ڕەنجی خۆی بەرهەمی هێناوەو بە خڕی ڕادەستی عێراقی كردووە.

دەسەڵاتدارانی عێراق و هەرێم وەك یەك تێوەگلاون لە دۆسیە گەورە دارایی و ئابوریەكاندا، لە هەردوو وەك یەك، دەیان بگرە سەدان گروپی خۆرەی سەر موڵك و ماڵی گشتی هەن، بەڵام جیاوازیەكە ئەوەیە، ئەمانەی هەرێم پەرتەوازە و ناتوانن بەرگری بكەن، ئەوانەی عێراقیش ئازایانە، چی گەندەڵیان كردووە، كە قەبارەكەی ملیارەها دۆلارە، ساغیان كردووەتەوە بەسەر هەرێمدا و شەقامی خۆیان وا تێگەیاندووە، ئەو دۆخەی كە تێیدان، هۆكارەكەی هەرێمە، لەكاتێكدا وەك پێشتریش ئاماژەم پێكرد، موچەی یەك مانگی عێراق بەقەد ساڵێكی هەرێمە، ئەمە جگە لە هەزاران سەفەقاتی گەورەی بەرپرسانی عێراق.

ئەم ڕقە كۆمەڵایەتیەی لە شەقامی عێراقی بەرامبەر هەرێم دروستبووە، گەر بە دیوێكدا هۆكارەكەی نەبوونی میدیایەكی عەرەبی سەر بە هەرێم بێت بۆ موخاتەبەكردنی شەقامی عێراقی و تێگەیاندنیان لەوەی، ئەوەی پشكی ئێوەی خواردووە و ئێوەی خستووەتە میحنەتەوە، ئەو سەدان گروپ و حیزبە جیاجیایانەن، كە بودجەكە بە كاملی بەش دەكەن و لە بازگەكانیش ڕەشوە وەردەگرن، لە سنورەكانیش تریاك دەخەنە نێو سەیارەی هاوڵاتی و بەزۆر پارەی لێدەسێنن، نەك خەڵكی هەرێم.

بە مانایەكی تر، دەسەڵاتدارانی هەرێم، سەرەڕای ئەو غەدرەی لە خەڵك دەیكەن لە زۆر ڕووەوە، خەڵكی كوردستانیشیان، دووچاری ڕقی كۆمەڵایەتی شەقامی عێراقی كردووە، نەیانتوانیووە بەرگری لە خۆیان بكەن، بەشەقامی عێراق بڵێن: ئێمە تەنها بەشی خەڵكی هەرێممان خواردووە، بەشی ئێوە لای لایەنە عێراقیەكانە، بۆیە ڕق لە خەڵكی هەرێم، هەڵمەگرن!

لە پاڵ ئەمەشدا، هەندێك نەك هەموویان( بەشێكیان بەرپرسیارانە مامەڵە دەكەن و دەست دەخەنە سەر برینەكان)، لەو پەرلەمانتارانەی كوردی بەغدا كە بانگەشەی ئۆپۆزسیۆن بوون دەكەن، لەم ڕووەوە ڕۆڵێكی تەواو خراپیان گێڕاوە، شەو و ڕۆژ لە میدیا و سۆشیال میدیا، قسە لەسەر خراپیەكانی هەرێم دەكەن، كەچی تا ئێستا بەیەك حەرف، نەیانوێراوە، قسە لەسەر ئەو هەموو خراپەكاریە بكەن، كە هێزە جۆراوجۆرەكانی عێراق پێی هەڵدەستن. نەك هەر ئەوە، هەندێك پۆستی بازاڕیان لە سۆشیال میدیا دەبینیت، دەیخوێنیتەوە، سەخڵەت دەبیت، ئەوەندە بەزمانێكی ئاست نزم نوسراوە.

خەڵكی هەرێم پەرلەمانتاری ناردووەتە بەغدا تا لەوێ شەڕی مافی بۆ بكات، نەك لەوێوە سەر قاڵی جنێودان و قسەكردن بێت لەسەر ناوخۆی كوردستان، چونكە ئەمەیان ئیشی پەرلەمانتارانی كوردستان و حیزبە ئۆپۆزسیۆنەكانە، كە لە نێو پەرلەماندا، خەڵكی عەلی حەمە ساڵح ئاسا كەمیان نەكردووە.

بە كوردی و كورتی، ئەنجامی ئەو شەڕە دەنوكەی لە نێوان كورددا لەبەغدا هەیە، كە بەپلەی یەكەم و دووەم و سێیەم و دەیەم، دەسەڵاتدارانی هەرێم لێی بەرپرسیارن، چونكە بەرپرسیارانە مامەڵەیان نەكردووە، ئینجا بەشێكی تری دەكەوێتە سەر شانی هەندێك پەرلەمانتاری ئۆپۆزسیۆنی بەغدا، كە بە شێوەیەك مامەڵە دەكەن، وەك ئەوەی تەنها بۆ پوست كردن و جنێودان نێردرابن.

ئەم دوو جیهەتە، نەك هیچیان بۆ خەڵكی بەشخوراوی هەرێم نەكردووە، بەڵكو لەسەر ئاستی شەقامی عێراقیش، بوونەتە هۆی چاندنی ڕقێكی كۆمەڵایەتی بەهێز بەرانبەر خەڵكی كوردستان.

دڵشاد ئەنوەر

پەخشی راستەوخۆی رادیۆ پۆلەتیک