قەرەیلان: سەربازانی توركیا پەنجەو شانی خۆیان دەشكێنن

ئەم بابەتە 78 جار بینراوە

پۆڵەتیك پرێس:
موراد قەرەیلان فەرماندەی هێزەكانی پاراستنی گەل (هەپەگە) و كەسی دووەمی پارتی كرێكارانی كورستان (پەكەكە) دەڵێت: چاوەڕێین لەناوچەی هەفتانین شەڕی نێوان گەریلا و سەربازانی توركیا گەرمترببێت.

موراد قەرەیلان دەشڵێت: سەربازانی توركیا لەناوچەكەدا بێ ئاون و پەنجە و باڵی خۆیان دەشكێنن تا لە شەڕ دووربخرێنەوە.

قسەكانی موراد قەرەیلان، فەرماندەی هێزەكانی پاراستنی گەل “هەپەگە” كە باڵی سەربازی پارتی كرێكارانی كوردسان پەكەكەیە لە چاوپێكەوتنێكدا لەگەڵ میدیای بووە، كە باسی لەوەش كردووە، توركیا هەموو قورسایی خۆی خستووەتە سەر هەفتانین و سەركەوتنی گەریلا لەناو خەڵك و میدیاكاندا بڵاودەبێتەوە و دوژمنیش ئەوە دەبینێت، لەبەر ئەوەش قورسایی تەكنیك و تەكنەلۆژیای خۆی، هەواڵگری و هێزە تایبەتەكانی خستووەتە سەر هەفتانین، دەیەوێت لەو رێگەیەوە ئەنجام بەدەست بهێنێت و گەریلا لەوێ بكاتە دەرەوە، بەڵام ناتوانێت.

قەرەیلان هەروەها دەڵێت: سەربازانی سوپای توركیا خواستیان ئەوەیە بچنە ناوچەی پیربولا، بەڵام نەیانتوانی لێی بچنە دەرەوەش، بێگومان من ئەوە بۆ ئەوە ناڵێم، كە هێزی گەریلا زۆر گەورە بكرێت و دوژمن لاواز نیشان بدرێت، بەڵام راستی شەڕەكە ئەوەیە ئەو شەڕە، كە لە 8ی ئابدا روویدا ئەو راستییەی زۆر زیاتر پیشانداین، ئەگەر ئیرادەی مرۆڤ و رێگای هاوچەرخ بە دروستی لە دژی تەكنەلۆژیای سەردەم بەكاربهێنرێت، ئەوا سەركەوتن بەدەستدەهێنرێت.

 

چاوەڕێین شەڕ لە هەفتانین گەرمتر بێت

 

هەر لەو چاوپێكەوتنەدا قەرەیلان ئاماژە بەوەشدەكات، توركیا دەیەوێت هەندێك شتی پێچەوانە بكات لەم رۆژانەدا هێڵی پیربولای بەچڕی بۆردومانكرد، لەبەر ئەوە لەوێ زیانی زۆریان پێگەیشتووە، خولوسی ئاكار وەزیری ناوخۆ، لەگەڵ چەند جەنەڕاڵێك و فەرماندە پلە باڵاكاندا چووە بۆ ئەوێ، ویستیان ورە بە هێزەكانیان لەوێ بدەن، ئەگەری ئەوەش هەیە پلانەكەشیان بگۆڕن، چاوەڕێكراوە كە هێرشەكانیان بە تەكنەلۆژیای جەنگی زیاتر بكەن، ئەگەری ئەوە هەیە “هێزە تایبەت و دەستەبژێرەكانیان” زۆر زیاتر بهێننە پێشەوە، بەكورتی ئێمە چاوەڕێین، كە شەڕ لە هەفتانین زۆر گەرمتر ببێت.

ئەوەش دەخاتەڕوو، گەریلاكانی هەفتانین گەریلاكانی سەردەمن، بێگومان ئەو تێكۆشانە ئەنجامی دەبێت، بەڵام لە ئێستادا بۆ ئەم ساتە ناتوانین بڵێین، هەڤاڵانی هەفتانین بە تەواوی بێ كەموكوڕین، نا، هەڤاڵان تا ئاستێك هێڵی گەریلایی سەردەمیان بەجێهێناوە، بەڵام كەموكوڕیش هەیە و ئێستا لەسەر ئەو كەموكوڕییانە رادەوەستن، ئێمە لەو بڕوایەداین، ئەگەر هەڤاڵان كەموكوڕییەكان نەهێڵێن، ئەوا كەس ناتوانێت لە بەرامبەر گەریلادا ڕاوەستێت.

 

سەربازانی تورك لەبەر ئەوەی هەمووكات ناتوانن بە كۆپتەر ئاو بگوێزنەوە، رۆژانە یەك لیتر و نیو دەدرێت بە یەك كەسیان

 

فەرماندەی هێزەكانی پاراستنی گەل ئەوەش دەڵێت: هەندێك لەسەربازانی توركیا پەنجەی خۆیان دەشكێنن، هەندێكیشیان باڵیان دەشكێنن بۆ ئەوەی لە بەرەی شەڕ بكشێنەوە، چونكە ترساون و نیگەرانن، فەرماندەكانیان بە بەردەوامی پێیان دەڵێن، “ئێمە ئەم كارەی ئەمڕۆ یان سبەی تەواو دەكەین”، بەڵام ئەوە بوو بە دوو مانگ و هەموو رۆژێك شەڕ روودەدات و هەموو رۆژێك دەكوژرێن.

لە بەشێكی دیكەی قسەكانی باس لەوەدەكات سەربازانی توركیا لەسەر شاخەكانن، بەڵام لەو شوێنانەدا سەرچاوەی ئاو نییە، ئاو لە خوارەوەیە، ئەوانیش ناتوانن بچنە خوارەوە و لە ژێرەوە ئاو ببەن بۆ سەرەوە، لەبەر ئەوە ئاو بە كۆپتەر لە باكوورەوە دەهێنن، گەریلا جار جار گورز لە كۆپتەرەكان دەدات، كۆپتەرەكانیش ناتوانن بە بەردەوامی بە ئاسمانەوەبن و هاتوچۆ بكەن و ترس لە بەرچاو دەگرێت و هەر وەك ئەوەی بڕوات بۆ چالاكییەك هاتوچۆ دەكات.

 

 

سەربازانی توركیا بۆیان هەیە ڕۆژانە یەك لیتر و نیو ئاو بخۆنەوە

 

قەرەیلان، دەربارەی جوگرافیای ناوچەكە دەڵێت: گورز لە دوو كۆپتەری كۆبڕا دراون، بێگومان تا ئێستا گورز لە ژمارەیەكی زۆر كۆپتەر دراوە، ئەو كۆپتەرانەی گورزیان بەردەكەوێت خێرا دەیان نیشێننەوە و بەو شێوەیە رێگە لە كەوتنە خوارەوەیان دەگرن، رەنگە بەهۆی ئەو رێوشوێنانەوە رێگە لە كەوتنەخوارەوەیان بگرن، بەڵام گورزیان بەردەكەوێت و هەندێك لەوانەی لە ناو كۆپتەرەكاندان دەكوژرێن.

ئاماژەی بۆ ئەوەشكردووە، سەربازانی تورك لەبەر ئەوەی هەمووكات ناتوانن بە كۆپتەر ئاو بگوێزنەوە، رۆژانە یەك لیتر و نیو دەدرێت بە یەك كەسیان، بێگومان لەبەر ئەوەی هەوا گەرمە ئەو ئاوە بەش ناكات، هەروەها خواردن بەشیان ناكات، ئێستا لە زۆرێك لە ناوچەكاندا كێشەی خواردنیشیان هەیە، یانی هەموو رۆژێك بۆ ئۆپەراسیۆن فەرمانیان پێدەكەن، بەڵام لەبەر ئەوەی گەریلا گورزیان لێدەدەن، ناتوانن لە ناوچەكەدا سەربەستانە بجوڵێنەوە و ئاویان دەست بكەوێت، لە دۆخی ئێستادا لە قەیراندان.

 

پێویستە گەریلا ئامادە بێت بۆ بەرەنگاربوونەوەی هەموو شێوازێكی هێرشی دوژمن

 

فەرماندەی هێزەكانی پاراستنی گەل ( هەپەگە)، وتیشی: دوژمنمان شپرزە بووە، بە بنبەست گەیشتووە، ئەوەتا خولوسی ئاكار هات، دیارە دەیەوێت هێزەكەی بگۆڕێت، ویستوویەتی خۆی دۆخەكە ببینێت، هات و بینینیی، ئەگەری ئەوە هەیە هەندێك گۆڕانكاری بكەن، بەڵام گەریلاش بەپێی ئەوە ئامادەكاریی خۆی دەكات، پێویستە گەریلا ئامادە بێت بۆ بەرەنگاربوونەوەی هەموو شێوازێكی هێرشی دوژمن.

قەرەیلان ئەوەشدەخاتەڕوو، ئەوان لە چوارچێوەی جددییەتێكی گەورەدا دەجوڵێنەوەو دەیانەوێت بەو شێوەیە ئەنجام بەدەست بهێنن، هەروەها بۆ ماوەیەكی كورت نزیك نابنەوە و كار ناكەن، بەڵكو پلان و شێوازی ئەوان درێژخایەنە، ئەوە بە تاكتیك سەیر ناكەن، بەڵكو بەشێوەیەكی ستراتیژی لێكدانەوەی بۆ دەكەن، ئەگەر نزیكایەتی بەو شێوەیە بێت، ئەوان ئەنجام بەدەست دەهێنن و لە شەڕدا سەردەكەون.

سەرچاوە: كەناڵی ئاسمانی ستێرك

 

پەخشی راستەوخۆی رادیۆ پۆلەتیک