پۆڵەتیك پرێس
بەمەبەستی رێگریكردن لە تەشەنەسەندنی ڤایرۆسی كۆرۆنا حكومەتی عێراق چەندین بڕیاری دەركرد، لەوانەش گەشتكردنی بۆ نزیكەی 20 وڵاتی جیهان راگرت.
نوسینگەی كازمی راگەیاندووە، بڕیارەكان لەمیانەی كۆبونەوەی لیژنەی باڵای تەندروستی و سەلامەتی عێراقی دران كە مستەفا كازمی سەرۆك وەزیران سەرۆكایەتی كردووە.
ئاماژە بەوەشكراوە، گەشتكردن لەنێوان و عێراق و 19 وڵاتی دیكە راگیراوە تاوەكو رێگری لە بڵاوبونەوەی كۆرۆنا بكرێت، هاوكات كازمی هەوڵەكانی كارمەندانی پزیشكی و تەندروستی بەرز نرخاندووە كە رۆڵیان هەبووە لە كەمكردنەوەی ژمارەی مردن و زۆری ئاستی چاكبوونەوەدا.
لە یەكێك لە بڕیارەكاندا هاتووە، جەخت كردنەوە لەسەر وەزارەتی پەروەردە بە رێنمایكردنی بەڕێوەبەرایەتیەكانی پەروەردە لە پارێزگاكان بەهەماهەنگی لەگەڵ كارمەندانی تەندروستی قوتابخانەكان لە بەشە تەندروستیەكان و پشكنینی خوێندكاران و كارمەندان لە ناو دامەزراوە پەروەردەییەكاندا.
باس لەوەشكراوە، هەڵمەتەكانی هۆشیاركردنەوە چڕتر بكرێتەوە بەتایبەت لە ڕێگەی كەناڵەكانی ڕاگەیاندنەوە.