سێ هەفتەیە هیچ حاڵەتێكی تووشبوون بەكۆرۆنا لەهەڵەبجە تۆمارنەكراوە

ئەم بابەتە 135 جار بینراوە

پۆڵەتیك پرێس:
ماوەی سێ هەفتەیە هیچ حاڵەتێكی نوێی كۆرۆنا لەشاری هەڵەبجە تۆمارنەكراوەو ئەمڕۆش دوایین نەخۆشی خەوێنراو لە هۆڵی نەخۆشخانەی وەفا رەوانەی ماڵەوە كرایەوە.

دكتۆر شاناز نەقشبەندی وتەبێژی بەڕێوەبەرایەتی گشتی تەندروستی هەڵەبجە بۆ پۆڵەتیك پرێس وتی: رۆژانی رابردوو دوو نەخۆشی كۆرۆنا لە نێو قاوشەكانی نەخۆشخانەی وەفا لە هەڵەبجە مابوونەوە، ئەمڕۆ ئەو دوو نەخۆشەش رەوانەی ماڵەوە كرانەوە و ئێستا نەخۆشخانەی وەفا هیچ نەخۆشێكی كۆرۆنای تێدا نەماوە.

وتەبێژی بەڕێوەبەرایەتی گشتی تەندروستی هەڵەبجە وتیشی: ماوەی نزیكەی سێ هەفتەیە هیچ تووشبوویەكی نوێی نەخۆشی كۆرۆنا لە هەڵەبجە تۆمارنەكراوە، ئەگەرچی رۆژانە پشكنینی ئەو كەسانەی گومانی كۆرۆنایان لێدەكرێت بەردەوامی هەیە.

پێشتر بەهۆی زۆری رێژەی تووشبوون بە كۆرۆنا لەپارێزگای هەڵەبجە دوو سەنتەری تایبەتی چارەسەركردنی تووشبووانی كۆرۆنا كرانەوە و چەند جارێكیش ژمارەی نەخۆشی داغڵكراو لە بێدی ناو هۆڵەكان زیاتر بوون، لە رۆژی 13-12-2020، یەكێك لە هۆڵەكان كە لەنێو نەخۆشخانەی بەركەوتووانی چەكی كیمیاییدا بوو داخراو تەنیا نەخۆشخانەی وەفا مایەوە.

پەخشی راستەوخۆی رادیۆ پۆلەتیک