عێراقییەکان دەستیان لەسەر دڵیانە

پۆڵەتیک پرێس: لاڤە واحید

لەگەڵ نزیکبوونەوەی ساڵیادی کوژرانی قاسم سولەیمانی فەرماندەی پێشووی فەیلەقی قودسی ئێران و ئەبومەهدی موهەندیس جێگری پێشووی سەرۆکی دەستەی حەشدی شەعبی، عێراقییەکان دەستیان لەسەر دڵیانە و لە ئەگەری هەر پلانێک دەترسن کە بۆ تۆڵەسەندنەوەی ئەو دوو سەرکردەیە بەڕێوبچێت.

رۆژی 3ی کانوونی دووەمی 2021، ساڵێک تێپەڕدەبێت بەسەر کوژرانی سولەیمانی و موهەندیس، کە ساڵێک بەر لە ئێستا و لە هەمان رۆژدا، لە بۆردوومانی فڕۆکەیەکی بێفڕۆکەوانی ئەمریکا لە نزیک فڕۆکەخانەی بەغدای نێودەوڵەتی کوژران.

لەگەڵ نزیکبوونەوە لە ساڵیادەکە و زیادبوونی هەڕەشەی میلیشیا عێراقییەکانی نزیک لە ئێران لەبارەی تۆڵەسەندنەوە، دلەڕاوکێی عێراقییەکان زیاددەکات و لەوە دەترسن هێرشی سەربازی بکرێتە سەر خۆیان و دامودەزگا حکومییەکانی عێراق.

کازمی هەوڵ دەدات عێراق لە هەموو روبەڕوبوونەوەیەک دووربخاتەوە

لە ناوەندی ئەو ترس و دڵەڕاوکێیانەدا، حکومەتەکەی مستەفا کازمی سەرۆک وەزیرانی عێراق هەوڵ بۆ ئەوە دەدات، وڵاتەکەی لە هەموو روبەڕوبوونەوەیەک دووربخاتەوە و دۆخەکانی نێوان واشنتۆن و تاران هێوربکاتەوە.

بەپێی چەند سەرچاوەیەکی عێراق، کازمی بە هەریەکە لە ئەمریکییەکان و ئێرانییەکان گەیشتووە و تەنانەت لەگەڵ میلیشیاکانیشدا گفتوگۆی کردووە و هەوڵیداوە رێگری بکات لە روودانی هەر هێرشێک کە لە ساڵیادی بۆردوومانەکەدا بەرژەوەندی ئەمریکییەکان بکاتە ئامانج.

ئەم هەنگاوەی کازمی دوای زیادبوونی هەڕەشەی هێزە چەکدارەکانی عێراق دێت، بەتایبەتی هەڕەشەی کەتائیبی حزبوڵا و بزوتنەوەی ئەهلی حەق، کە قەیس خەزعەلی ئەمیندارییان بەر لە دوو رۆژ وتی: تۆڵەی سولەیمانی و موهەندیس لە ئەستۆی ئێمەدایە.

میدیاکانی عێراق رۆژی شەممە بڵاویان کردەوە، ده‌سه‌ڵاتدارانی عێراق و ئه‌مریكا هۆشدارییان داوه‌ته‌ میلیشیاكانی سه‌ر به‌ ئێران، كه‌ هیچ هێرشێك بۆسه‌ر دیبلۆماتكار و هێزه‌ سه‌ربازییه‌كانی ئه‌مریكا له‌ عێراق ئه‌نجامنه‌ده‌ن.

ئەمریکا کەشتی فڕۆکەهەڵگری “یو ئێس ئێس نیمیتز”ی لە رۆژهەڵاتی ناوەڕاست کشاندووەتەوە

لەلایەکی دیکەوە، رۆژنامەی نیویۆرک تایمزی ئەمریکی رایگەیاند، ئەمریکا کەشتی فڕۆکەهەڵگری “یو ئێس ئێس نیمیتز”ی لە رۆژهەڵاتی ناوەڕاست کشاندووەتەوە، بەمەش لەگەڵ نزیکبوونەوەی ساڵیادی کوژرانی سولەیمانیدا، پەیامی دژیەک بۆ ئێران دەنێرێت.

رۆژی پێنجشەممەی رابردوو، کریستۆفەر میلەر، وەزیری بەرگری ئەمریکا بە وەکالەت رایگەیاند، کەشتی فڕۆکەهەڵگری “یو ئێس ئێس نیمیتز” لە رۆژهەڵاتی ناوەڕاست دەکشێنرێتەوە و بەرەو شوێنی خۆی لە کەناری رۆژئاوای ئەمریکا دەبرێت.

لەماوەی رابردوودا، چەند بەرپرسێکی ئەمریکی وتیان: بوونی کەشتییەکە لە ناوچەکانی نزیک کەنداو لە چوارچیوەی ئامادەکاری ئەمریکادا دێت بۆ وەڵامدانەوەی هەموو جۆرە هێرشێک کە لەلایەن ئێرانەوە جێبەجێ بکرێت.

لەلایەکی دیکەوە، رۆژنامەی واشنتۆن پۆست لە زاری چەند بەرپرسێکی باڵای وەزارەتی بەرگری ئەمریکاوە رایگەیاند، ئەمریکا بەشێوەیەکی نهێنی چەند زانیارییەکی دەستکەوتووە لەبارەی ئەوەی چەند سەرکردەیەکی میلیشیاکانی سەر بە ئێران چاویان بە فەرماندەی فەیلەقی قودسی ئێران کەوتووە و ژمارەیەک چەکی ئاسایی و پێشکەوتوو لە سنوری ئێران بەرەو عێراق براون، یەکێک لە بەرپرسەکانیش وتی: لە کاتی کوژرانی سلێمانی و موهەندیسەوە ئەمە سامناکترین دۆخە و مەترسی هێرشی ئاڵۆز هەیە.

لە کاتی کوژرانی سلێمانی و موهەندیسەوە ئەمە سامناکترین دۆخە و مەترسی هێرشی ئاڵۆز هەیە

لەدوای رووداوەکەی کانوونی دووەمی ساڵی رابردووەوە، عێراقییەکان رۆژەکانیان لە ترس و دڵەڕاوکێی هێرشی دووبارەدا بەسەربردووە، ئەمە جگە لەوەی دوای رووداوەکە، چەندین جار لەڕێی موشەک و چەکی جۆربەجۆرەوە، هێرش کراوەتە سەر بنکە و بارەگای هاوپەیمانان و ئەمریکا لە عێراق.

بەپێی رای شارەزایانی سیاسی، ئەو دۆخە بۆ دەسەڵاتی عێراق و ناوچەکەش مەترسیدارە، لە ئەگەری هەر هێرشێکدا دووبارە عێراق دەبێتەوە گۆڕەپانی ناکۆکی و پێکدادانەکانی نێوان واشنتۆن و تاران، جگە لەوەش، سەرکەوتنی ئێران لە بێزارکردنی ئەمریکییەکانی عێراق و راوەدوونانیان و دەرکردنیان لە وڵاتەکە بە یەکجاری، رەنگە ببێتەهۆی ئەوەی هاوشێوەی ئێران، سزای توند لەلایەن ئەمریکاوە بەسەر عێراقدا بسەپێنرێت و قەیرانەکانی وڵات چەند هێندە زیاد بکات.

پەخشی راستەوخۆی رادیۆ پۆلەتیک