نووسینی: سەمەد زەنگەنە
حەسەن زیرەك ئەگەر خوێندەواریشی نەبوبێت ، زانایەكی بلیمەتی سۆسیۆلۆژیای كۆمەڵگەی كوردەواری بووە ، شیكاری فۆلكلۆر بە شێوەیەكی سۆسیۆلۆژی هیچی كەمتر نیە لە كۆكردنەوەی فۆلكلۆر ، من دەمێكە وتوومە كورد مێژوییەكی نوسراوی ئەوتۆی نیە ئێمە وەكو نەتەوەیەك خۆمان بناسین ، شوێنەوارێكی دێرین شكنابەین ، پارچە بەردێكمان نەدۆزیەوە تێیدا نوسرابێت ( من فڵان كوڕی فڵانم پادشای كوردانم ..) ، هەرچی لە لایەن گەڕیدەو ڕۆژهەڵاتناسەكانەوە لە خاكی ئێمەدا دۆزراوەتەوە ، یا پادشای ئەكەدی ، یا ئاشوری یا گەل و نەتەوەیەكی تر بوون .
كورد پێغەمبەرێك ، فەیلەسوفێك ، چاكسازێكی ئاینی ، كۆمەڵایەتی و … شكنابات ! ئەوەی هەمانەو نیمانە فۆلكلۆرێكی زۆر و دەوڵەمەند ، پڕ لە دەزولەی مێژوو و فەلسەفەو ، سیاسەت و سۆسیۆلۆژیا و هەموو كایەكانی ژیان .
من لەو كایەو زانستانەی دی دەگەڕێم و دەم وەرنادەم ، ئەو بوارانە كەسی تایبەتمەند و شارەزایان پێویستە ،دەمەوێت باسێك لە حەسەن و فۆلكلۆرو سوسیۆلۆژیا بكەم ، چەند جوان و بە سەلیقەو شارەزایانە باس لە ڕووە شاراوەكانی پەیوەندییەكانی كۆمەڵگەی كوردەواری دەكات ، بەندێك ، چوارینەیەك ، شیعرێكمان بۆ دەڵێت ، ئەگەر بە شێوەیەكی ڕوكەشی لێی بڕوانین وشەكان زۆر ئاسایین ، شیعری گۆرانیەكان سادەو ساكارو هەندێكجار بازاڕین ، بەڵام ئەگەر واتاو لێكدانەوەی ژێر پەردەی ئەو شیعرانە شیتەڵ و شیكار بكەین دەبینین توێژینەوەیەكی سۆسیۆلۆژیانەی پەیوەندییە كۆمەڵایەتیەكانی قۆناغە جیاجیاكانی كۆمەڵگەی كوردەوارییە .
ئێمە لەم گۆشەیەدا هەوڵدەدەین هەرجارەو چەند دێڕێكی گۆرانیەكانی حەسەن شی بكەینەوە .
(لانك لانك لانكۆڵێ ، لانك لە دارهەنارێ ، وەستا بێت لە تارانێ ، لانكێ دروستكا بۆ چاوجوانێ ، دەك ڕۆڵە سەردڵ خڕ بی ، باب مردوو بی، شەو درەنگە بۆ جێژوانێ ).
لەم وێنە شیعرییەدا حەسەن زیرەك ، فیلمی عیشقێكی قەدەغەو حەرامكراوی پێوەری كۆمەڵگەمان دەخاتە بەر دیدە ، لایەنێكی خۆشەویستیەكەمان پێ دەناسێنێ كە ژنێكی شوكردوی خاوەن منداڵێكی ساوای نێو بێشكەیە ، لایەنی دووەم پاڵەوانێكی شاراوەی ئامادەباشی كردەیەكی سێكسییە ، گرنگ نیە كێیەو چۆنە.
ژوان ماڵی پاڵەوانی یەكەمە ، مناڵی ساوا خەوی نایەو بوەتە ڕێگر لە پێكگەیشتنی هەردوو خۆشەویست و عیشقی حەرام ، دڵە بچكۆلەكەی هەواڵی ژوانێكی قەدەغەكراوی داوەتێ ، دەگرێ و نانوێ ، دایكی عاشق پەلەیەتی ، كاتیش تەنگی پێهەڵچنیوە ، سەرەتا دەكەوێتە ماستاوساردكردنەوەو پیاهەڵدانی مناڵەكەی ، بۆ نانوی من لانكی تۆم لە دارهەنارو وەستای دەستڕەنگینی تارانی دروستكردووە ، بنوو چاوجوانەكەی دایكی ، گەر ئەو لانكەت بە دڵ نیە داری كنێرێ دەنێرمە لای وەستا دەستڕەنگینەكانی هەولێرێ و لانكێكی نەرمترو جوانترت بۆ دروست بكەن ، تۆ ئێستا بنوو ، تكایە شەو ڕاشکاوەو درەنگە ، بەڵام مناڵ نانوێ ، ناچار دەبێ بڕیارێك بدات ، یان دەسبەرداری خۆشەویست و ژوانەكەی بێت ، یانیش مناڵە تاقانە چاوجوانەكەی .
بۆیە لە كۆتاییدا هوروژمی عیشق و ژوان و سێكس ، پاڵەوانی سەرەكی فیلمەكەی زیرەك هاندەدات دوعای سەردڵ خڕبون و مردنی بابی ساواكەی بكات و دەڵێت : نانوی ؟ دەك ڕۆڵە سەردڵ خڕ بی ، باب مردوو بی َ شەو درەنگە بۆ ژوانێ ، وا سپێدەی بەیان سەرەتاتكێیەتی .
لەم وێنە شیعرییەی زیرەكدا دەگەڕینەوە ئەو پرسیارەی ئایا سێكس بنچینەو بناغەی خۆشەویستیە ، یان خۆشەویستی بناغەی سۆزی سێكسییە ؟ ئەو پرسیارەی بە درێژایی مێژووی مرۆڤایەتی وەڵامێكی قەناعەتپێكەری نەبووە ، بەڵام لێرەدا حەسەن زیرەكی بلیمەت فرۆیدی زانای تێپەڕاندووەو سێكسی كردۆتە بنەمای سۆزی خۆشەویستی .