لەم رۆژانەی پێشودا دكتۆر نەوزاد ساڵح رەفعەت وەرگێڕاوی كوردی گەشتەكەی فرەیزەری بۆ ناردم ، یەكەم جارە پوختەی گەشتەكەی فرەیزەرو ئەوەی زۆرترین پەیوەندی بە كوردەوە هەیە بە شێوازێكی جوان دەكوردێنرێ .
ناوی كتێبەكە ” گەشتەكەی فرەیزەر بە كوردستان و میزۆ پۆتامیادا ، لە ساڵی 1834ی زاینی ، لێرەدا من نامەوێ خوێندنەوە بۆ كتێبەكە بكەم ، تەنها ئەوە نەبێ كە زۆر بە كورتی دەمەوێ ئێوە بگێڕمەوە بۆ 186یان 187 ساڵ لەمەوبەر ، ئەو دەم دەبێت لە بارو دۆخی ئێستای خۆمان بپرسین :
یەكەم :
لە 1ی تشرینی دووەمی 1834لە سلێمانیە، بەم جۆرە باسی كورد و سەرانی كوردو هەردوو برا سلێمان پاشاو مەحمود پاشا دەكات ” هەمیشە پاشاكانی ئێرە لە شەڕو پێكدادانەكانیاندا پەلكێشی لە شكری ئێرانی و عوسمانی دەكەن بۆ سەر یەكتر ” ، ئەوە 186 ساڵ لەمەوبەرە .
دووەم :
دەڵێت ” پاشای سلێمانی ئێران و دوژمەنەكانی خۆی بە هێزترو خۆیشی بە پێچەوانەوە رۆژ بە رۆژ لاواز تر دەبوو، پاشای داماو نەیدەتوانی خۆی لەو گێژاوە رزگار بكات ، چونكە لاواز ترین كەس بوو ”
ئەم دوو خاڵەی سەرەوە دوو خاڵی زۆر نەرێنی سەردارانی كوردن بۆ هەمیشەو تا ئێستا
سەبارەت خاڵی ئەرێنی كوردیش دەڵێت :
یەكەم :
دەربارەی میر محەمەد پاشای رەواندز دەڵێت :
” ئەم میرە بڕیاری دابوو ئەگەر دزێك شتێكی پێ بگیرێت و سەلمێنرا كە دزی كردووە،هەر لەو شوێنەی دزیەكەی كردووە سزا دەدرێت ” هەڵبەت باسی سزای توندی تاكوشتنیش دەكات ، چاكسازی راستی ئەمەیە نەك حەكایەت .
دووەم :
فرەیزەر دەڵێت رۆس لە بارەی كوردەوە نووسیویەتی:
ئەمانە زۆر توند ڕەون و هەمیشە پەلەیانە لەوە دەچێت خودا ئەم كوردانەی بۆ جەنگ درووست كردبێت ” جەنگاوەری ئازاین بەس كەمتر بۆ خۆمان .
سێیەم :
دەڵێت ” هەرگیز لە هیچ جێگایەك نەمدیوە خەڵكی ئەوەندە بە تەنگ جێبەجێ كردنی ئەو پەیمانانەوە بن كە داویانە بە دۆستەكانیان ،لە هەر جێگایەكی كوردستان بێت ئەو پەیمانانە بە رێك و پێكی ئەنجام دەدەن”
چوارەم :
شانازی بە نیشانشكێنی خۆیانەوە دەكەن ” ناحەقیان نەبوو،چونكە تفەنگەكانی ئەوان زۆر ناشیرینترو خراپتر بوو لە تفەنگەكەی من لە كاتێكا تفەنگەكەی من نوێترو باشتریش بوو،بەڵام هەرگیز توانای دەست راستی ئەوانم نەبوو ”
كتێبەكە شایانی خوێندنەوەیە ، دكتۆر كارێكی باشی كردووە، ماوەتەوە ئەوەش بڵێم كە مامۆستا جەمال عەبدول پێشەكیەكی كورتی بۆ كتێبەكە نووسیوە.
سوپاس بۆ دیاریەكەت دكتۆر لە كۆتا رۆژەكانی ساڵی كۆرۆناكەدا.
لەتیف فاتیح فەرەج