بەنداوی دەربەندیخان نۆژەن دەكرێتەوە

ئەم بابەتە 80 جار بینراوە

پۆڵەتیك پرێس

بەڕێوەبەری بەنداوی دەربەندیخان رایگەیاند، حكومەتی هەرێم بودجەی تەرخانكردووە بۆ چاككردنەوە و نۆژەنكردنەوەی ئەو بەشانەی بەنداوی دەربەندیخان كە لە بومەلەرزەكەی ساڵی 2017 زیانیان بەركەوتووە و تا ئێستا چاكنەكراونەتەوە.

رەحمان خانی بەڕێوەبەری بەنداوی دەربەندیخان بۆ پۆڵەتیك پرێس رایگەیاند، ئەنجومەنی وەزیرانی هەرێم رەزامەندی دەربڕیوە لەسەر خەرجكردنی بڕی دوو ملیار و 200 ملیۆن دینار بۆ چاككردنەوە و نۆژەنكردنەوەی ئەو بەشانەی بەنداوی دەربەندیخان كە لە دوای بومەلەرزەكەی ساڵی 2017ەوە زیانیان بەركەوتووە.

وتیشی، “بەشێكی كارەكان بریتیە لە توێژینەوە و دیزاین و ئامادەكردنی تەندەرو دیكیۆمێنت بۆ بەشە زیانلێكەوتووەكانی قۆناغی دووەمی بەنداوەكە، بەشێكی دیكەی كارەكان پەیوەستە بە رووپۆشكردن و نوێكردنەوەی رووی خوارەوەی بەنداوەكە كە زیانی بەركەوتووە لەگەڵ چاككردنەوە و نۆژەنكردنەوەی چەند بەشێكی دیكەی بەنداوەكە”.

بەنداوی دەربەندیخان یەكێكە لە بەنداوە ستراتیجییەكان لەسەر ئاستی عێراق و بەفەرمی لە ساڵی 1961 كراوەتەوە، ساڵی 2017 لە ئەنجامی بومەلەرزەیەك بەگوڕی چوارو پێنج پلەی رێختەر لە بەنداوەكەیداو زیانێكی زۆری بەچەند بەشێكی بەنداوەكە گەیاند.

پەخشی راستەوخۆی رادیۆ پۆلەتیک