هەرێم، لەبەرامبەر ئاڵۆزیە ناوخۆیی و هەڕەشە دەرەکیەکان!

لە دوای روخانی رژێمی سەدام، هەتا ماوەیەکی زۆریش هەرێمی کوردستان نیمچە دەوڵەتێک بوو لە ناو دەوڵەتێکی تر، بەڵام سیستەمی سەقەت و خراپ بەڕێوەبردن لە لایەک و پلان و هەڕەشە دەرەکیەکانیش لە لایەکی دی، تا دێ پێگەی هەرێم لاواز و بێهێز دەکەن. ئەگەر ستراتیژیەت و پلانە سیاسی و ئابورییەکان گونجاو و راست و بەرزە فڕانە نەبان، ئەوا بێگومان پیلانە دەرەکی و هەڕەشەکان ئەو کاریگەریەیان نەدەبوو کە ئەمڕۆ چاویان لە هەرێم زەق کردونەتەوە.
– سیاسەتی ئابوریی سەربەخۆ.
– سیاسەتی نەوتی.
– پڕۆژەی سەربەخۆیی.
نەک هەر بێ ئەنجام بوون، بگرە زۆر خراپیش بەسەر گەل و وڵاتدا شکانەوە. ئێستا هەرێم بەچەندین قەیرانی گەورەدا تێدەپەڕێ و لە هەمان کاتیشدا نەیارە دەرەکییەکان و هەندێ لایەنی شۆفینستی کاریگەری عێراقیش بەهەڵی دەزانن و ئامادەن لە بەرامبەر هەرێم پیلان و پلانەکانیان یەک بخەن.
ئەوەی لەناوخۆ روویداوە و روودەدا بەرپرسیارەتیەکەی لە ئەستۆی ئەو سەرکردایەتیەیە کە لە قۆناغی رزگاری سەرکەوتنی وەدەستهێناوە و لە دەوڵەتداریش بەرەو مایەپوچی دەڕوا. سەیرەکە لەوەیە تا ئێستا سەرکردایەتی کلاسیکی کوردستان پێیوایە قەیرانەکان کاتین و تێدەپەڕن، ئەوانیش (معزز مکرم) لەسەر کورسی دەسەڵات درێژە بەو رەوتە سیاسیە نەگونجاوە دەدن، کە لەلایەن چاودێران و هاوڵاتیانی ئەم وڵاتە دەیان پرسیار و هێمای سەرسوڕمانی لەسەرە!
هەڕشە دەرەکییەکانی سەر هەرێم مەترسیدارن و ناوخۆیەکانیش ماڵوێرانکەرن، بەڵام ئایا ئێـمە دەتوانین بە چارەسەرکردنی کێشە ناوخۆییەکان کاریگەری هەڕەشە دەرکیەکان لانیکەم کەم بکەینەوە؟ ئەو وەڵامە لای سەرکردە و بڕیاربەدەستەکانی وڵاتن. ئەوەی دەبینرێ تا هەنوکە ئامادەنین وەڵامێکی دروست بدەنەوە، چونکە ئەو کات هەنگاونان بە ئاراستەی چارەسەری کێشە بنەڕەتیەکان دەبێتە ئەرکی سەر شانیان. من نازانم ئەوان لەو گۆڕانکارییە کۆمەڵایەتی، ئابوری و سیاسیانەی کوردستان تێناگەن یان نایانەوێ تێی بگەن؟
ئەم قۆناغە هەستیارە پێویستی بە پڕۆژەیەکی نیشتیمانی بۆ چاکسازی بنەڕەتی و دارشتنەوەی ستراتیژیەتێکی سیاسی نوێ هەیە. بەبێ ئەوە هەڕەشەکان زەبری خۆیان دەوەشێنن و تەڕ و وشک بەیەکەوە دەسوتێنن.
ئایا کاتی ئەوە نەهاتووە ئێمەی لایەنە سیاسیەکان لە پێناوی دوا رۆژی ئەم نیشتیمانە دەستبەردای ئەو عەقلیەتە ماوە بەسەرچووە بین، کە دەقمان پێیوە گرتووە؟
ئارێز عەبدوڵلا

پەخشی راستەوخۆی رادیۆ پۆلەتیک